已為人母的湯盈盈昨日與錢嘉樂Sweet爆出席活動，提到愛女Alyssa開始食粥仔，但起初未調節好，令囡囡又舌累又嘔！她現已聘請傭人，讓她安心復工；嘉樂則表示在家中安裝CCTV（閉路電視），等拍戲時也可「窺女」。

盈盈樂樂手拖手出席《關愛．大熊貓》活動，大晒恩愛。

盈盈扮熊貓動作趣怪，嘉樂望到實，大讚老婆「點都靚」！

湯盈盈昨日偕老公錢嘉樂出席《關愛．大熊貓閉幕禮》，席間二人大晒恩愛，手拖手上台Sweet到暈，當司儀叫盈盈擺熊貓食竹Pose時，嘉樂即大讚：「對我嚟講點都靚！」冧到太太甜笑大嗌：「So Sweet！」羨煞旁人。提到5個月大的女兒Alyssa，盈盈稱囡囡已開始食粥仔：「差唔多煲四次先啱佢食，頭三次直頭舌累出嚟，仲嘔添！依家調節得好幼滑，佢食得好好。」本月底復工拍賀歲劇的她，直言會掛住愛女，但新請的傭人湊得很好，加上母親將從加拿大返港，故她很放心工作：「初頭幾擔心，傭人抱女連手都硬晒，但佢好有心機又肯學，我哋溝通得好好，佢依家仲叻過我，話番我轉頭！」

坐完月搵定學校

而嘉樂表示工作時太太也會傳B女相給他看，不用埋位時則會透過家中的CCTV（閉路電視）「窺女」，他笑說：「令我仲掛住啲添！依家盡量控制睇少啲，咪太分心。」問到兩公婆都忙拍戲，會否怕囡囡轉黐傭人？他說：「我冇法一定要做，太太就好想繼續工作，佢會平衡，加上套劇短，我都支持，如果佢鍾意演戲，工作時間又短，咁咪接囉。」談到盈盈有意炮製「非洲B」，嘉樂直言希望為囡囡添個伴，並透露正為囡囡找定學校：「本土學校盈盈吃力啲，因為佢中文未必咁好，或者國際學校都係好方向，起碼媽咪照顧到功課，最緊要個女第時對人好。」盈盈則大爆坐完月便開始找學校，但自稱不是怪獸家長。

另外，鄭欣宜日前被拍得與紋身潮男Silas摸黑咀嘴，同屬星煥的胡鴻鈞表示，純粹是欣宜為人西化，Goodbye Kiss是正常禮儀，問到欣宜是否拍拖？他卻誤爆：「應該唔係，佢依家專注事業，自從上次韓籍男模（崔豪進）後，佢冇講佢拍拖。」追問欣宜認與崔豪進拍拖？他口窒窒說：「唔係，佢話係Close Friend。」