「剛晶」添7.26磅大隻仔

已故全國政協副主席霍英東長孫34歲的霍啟剛與四面奧運跳水金牌得主、31歲的郭晶晶於去年11月結婚，於洞房夜一索得男！昨日晶晶在養和醫院誕下霍家第四代「金叵羅」，初為人父的啟剛於昨午12時許已急不及待在微博分享喜悅：「親愛的朋友們：我和晶晶的兒子已經在今天早上出生了，體重3.3公斤（7.26磅），母子平安健康！小生命的順利誕生，我們感到非常開心，家人亦感到無比的喜悅！」他又感謝醫護人員、傳媒朋友及親朋好友的關心及祝福，並祝大家生活愉快，身體健康！

啟剛冇瞓陪妻兒

隨着啟剛微博報喜，在醫院守候的傳媒更見墟冚，已逾半百人，期間不時有禮物及花籃送往晶晶休息的病房。至下午1時10分，爺爺霍震霆步出醫院大門受訪，見他身穿西裝並特意打上喜氣洋洋的紅色領呔迎愛孫，全程喜上眉梢，笑到見牙唔見眼。問到「剛晶B」似誰？他說：「都係似父母混合，幾大隻。」不過，被問到乖孫出世時間、晶晶是自然分娩還是剖腹分娩時，他保密迴避：「兩個（母子）好健康，等囝囝佢抖一兩日，佢哋會分享經驗！」對於BB改名問題，他笑咪咪地說：「呢個係爺爺嘅任務！終生嘅，一定要審慎。（有Idea未？）係有Idea。（跟族譜？）要幾方面配合。」

談到抱孫心情，霍老爺喜形於色，又透露霍老太已見過BB：「都可以叫榮升爺爺啦！特別媽咪最開心！頭髮都幾多！（有冇抱過BB？）有呀！有少少唔係好熟手。」並不自禁做出抱B姿勢，可見樂在其中。問到對新抱晶晶的獎勵，他遊花園說：「佢叫我代佢哋講：『你哋啲同事咁多日咁辛苦，唔好意思。』啟剛都話自己冇瞓幾日，抖吓先同大家分享。（有冇禮物畀孫仔？）等佢都抖吓先，見佢幾叻，捽下眼呢，又瞓番。」至於擺滿月酒一事，他說：「我哋好民主，大家傾傾先。」另外，昨晚記者致電霍老爺時，原來他已身處內地向領導報喜：「工作嘛！同領導食飯。」問到他有否與BB合照？他笑說：「等佢瞓一、兩日先啦！（大派利是畀員工？）等我返嚟同你講。」

高度戒備行秘道

今次霍家誕下第四代掌門人，霍家上下既隆重又保密，進出醫院時大多使用醫院職員專用的秘密通道，平日面對傳媒亦三緘其口，作風低調。今次晶晶為霍家開枝散葉，獲霍家錫到燶，但早前《好報》已率先披露「剛晶」一家三口已獲贈價值近兩億元、位於沙宣道霍家大宅附近的獨立屋，及後又有指霍家在「家族基金」中撥出１億元作為「金叵羅」的教育基金。