通訊事務管理局日前公開調查報告，披露亞視主要投資者王征直接參與亞視運作，向亞視罰款100萬元，以及勒令執行董事盛品儒須在7日內離職，照推算即9月2日或之前亞視方面要作出回應，現時盛品儒成「失蹤人口」。

亢帥克不希望亞視有變動，否則便要搵定新東家。

昨日亞視高層葉家寶如常返回亞視，問到盛品儒會否上班？他說：「暫時未知。」而藝人林紫君、蔡國威及亢帥克等陸續現身，「亞洲之子」亢帥克說：「亞視有幾千員工等住開飯，我唔希望有任何變動！（如果真係，你有咩打算？）睇吓有冇新東家請我囉！」

至於蔡國威透露會續約，新約於9月1日生效，問到倘若亞視營運上有問題，會否擔心受到牽連？他說：「唔會！我真係唔擔心！覺得只要做好本分就得。（梁思浩話拖糧喎！）佢係外判節目，近半年我哋出糧好準時。」而林紫君則自言很少返公司，未有與同事討論相關問題，她竟問記者：「係咪要轉行？你哋請唔請人呀？」