新鮮出爐的十位港姐決賽佳麗昨日會見傳媒，參選以來見報率極高的是非佳麗(13)歐陽巧瑩再次被爆料指虛報學歷，她即寸爆報料人「收錯風」；而一口鄉音的(9)劉溫馨則被網民狠批英語！

歐陽巧瑩被指虛報學歷，她即寸寸貢反擊，絕對是非一般「友誼小姐」！

梁家欣胸邊現膠紙痕，相信不會影響泳裝表現！

沈桂澄直認跟周家蔚有親戚關係，不過真係疏到唔疏！

TVB Fun投票最高票數5位佳麗

前晚《2013香港小姐競選》準決賽選出十強佳麗進身決賽，昨日佳麗會見傳媒，其中是非港姐(13)歐陽巧瑩又被爆料指虛報副學士學歷，又自吹自擂好快加入無綫，令無綫有造假之嫌！對此，歐陽巧瑩寸爆說：「我冇講過讀完（副學士），不嬲都係話只完成咗第一年，個爆料者料收錯就唔好學人報料囉！（得罪嗰個中學同學爆料？）咁我真係唔知！佢都影響唔到我啲咩，亦唔需要畀啲無謂嘅人、事去影響情緒，咁會阻住自己發展。」對於有指她自言會加入無綫，她否認：「我覺得十分荒謬，我無端端點會同人哋喺呢段時間講呢啲嘢，我希望佢有證據先好講囉！」而無綫發言人澄清沒有為佳麗隱瞞學歷，如佳麗已完成該學歷，會在資料寫上「畢業」。

沈桂澄認係周家蔚親戚

至於(9)劉溫馨近日在港姐官網上以中英語留言拉票，但被網民狠批英語「港式」兼文法錯，劉溫馨死撐說：「我識講英文，不過一定冇外國佳麗咁好，而且『add oil』呢啲大家都經常講，知道係『加油』嘅意思。」她更被網友揶揄鄉音重，日後上無綫節目時或需聽配音。而(12)梁家欣胸旁有膠紙痕，她相信到決賽時膠紙痕會消散，不會影響三點式泳裝美態。

此外，有指(7)沈桂澄跟周家蔚是親戚，沈桂澄承認：「佢係我堂哥嘅表姐。（過你兩招選美心得？）冇！我參選時好低調，平時少聯絡，喺化妝間撞過一、兩次有傾偈。（邊位佳麗最有威脅？）(6)劉佩玥同(17)陳凱琳，(6)係最高，我最矮，企喺佢隔籬大壓力，而(17)就個樣好標致又有腹肌。（你有胸！）各有各好！」而最後一位入十強的(16)徐韶蓓前晚受訪時表示驚不能入圍，認同多男觀眾投票給她與其身材好有關。此外，被指整容的陳凱琳前日上載兒時照片以行動粉碎傳聞。