跳舞組合HotCha成員Winkie(黎美言),「舞」功當然有番咁上下,近半年她由學Funky Dance轉戰鋼管舞,希望可擴闊舞蹈眼界,為觀眾帶來新鮮感!

雙手放鬆,踮起腳打圈踏步左、右、左

三步後雙手捉實鋼管,左腳盡力Fing再收腳

雙腳膝蓋緊貼鋼管轉

安全着陸

用腕力爬上鋼管,再以大腿肌肉緊扣鋼管以維持平衡

待平衡後嘗試放開雙手

成功於空中平衡
跳舞多年的Winkie除享受當中的樂趣外,更從中尋找及認識自己。

Winkie(右)與導師Symone默契漸增,常切磋「舞」功。

原來Winkie不經不覺已跳舞近十年,她表示中三開始已對跳舞充滿熱誠,兒時亦跳跳紮坐不定:「細個父母畀我學跳芭蕾舞,但之後我冇堅持,有時諗如果繼續,可能我依家走嘅路就有啲唔同。不過,好彩我都冇放棄過跳舞,轉而鍾意咗Funky Dance。」Winkie笑指讀書時期對跳舞最瘋狂,試過深夜突然「舞」癮大作,臨時找不到有全身鏡的舞房,便到港鐵站對着廣告板跳,更險被困其中:「因為要避開港鐵站職員,佢哋見到會趕我哋走o架,點知避避吓真係差啲落埋閘走唔到!」

怕歌迷接受唔到

雖然Winkie所屬的組合HotCha今年較為低調,但她毫不鬆懈,一直習舞唱歌,以免原地踏步!有見近半年鋼管舞愈來愈流行,Winkie決定作出新嘗試,在朋友介紹下認識已教鋼管舞7年的Symone,並漸漸發掘出鋼管舞的樂趣:「初初接觸鋼管舞都有少少抗拒,覺得個姿勢好似過咗火位,又似只係喺夜店先做,好怕歌迷會接受唔到,但學咗近半年後先知完全唔係我諗咁樣!」

望拍得住麥當娜

Winkie憶述第一次嘗試爬上鋼管時,即感受到不懂運用身體每部分的肌肉,只懂用蠻力向上爬,故滑下來時險弄傷大髀內側,她透露上堂後肌肉痠痛了個多星期:「我有跳舞底子,所以已經唔算最辛苦,同埋上堂前又做足拉筋動作,所以呢一個步驟真係好重要!依家學耐咗當然唔會再痛啦,仲學識喺空中平衡,可以單用腳翹實鋼管、雙手再放開,而倒豎葱就學緊,呢個真係幾有難度!雖然練習過程好辛苦,不過唔流過汗水又點算真正付出過呢?做到時個滿足感仲會超大o架!」她更透過鋼管舞學懂怎樣利用舞蹈突出女性的曲線美,以及了解身體可做出不同的變化:「希望遲啲可以喺舞台上表演畀大家睇,之前見過蔡依林、麥當娜喺演唱會上表演,每個動作都令人嘆為觀止,我會努力鑽研唔同嘅舞步,有信心終有一日我都可以跳到同佢哋一樣!」

舞出真我

鋼管舞能充分激發女性潛在的嫵媚美態,動作可因應個人領悟再作出不同演變,轉而透過身體盡情展露於觀眾眼前。而鋼管舞能增強肌肉的耐力及身體的協調性,並主要分為桿上技巧及桿下舞蹈動作。桿上技巧可鍛煉全身每個部位的肌肉,尤其是手臂、臀部、大腿及腰部,可為女性塑造出更完美的體態;桿下舞蹈則融合爵士、芭蕾及肚皮舞等經典動作,增強視覺效果,而迴旋時需收緊兩部分肌肉才可做出動作,又需集合全身力氣,故亦有助訓練心肺功能,但練習前必須做足熱身運動,以免肌肉過度繃緊。