現今o靚模為博出位不惜各出奇招,惹來同行白眼,昨日模特兒莊思敏在「不知情」的情況下與o靚模梁晶晶同場,即時表現厭惡,更拒絕合照;而梁晶晶亦不甘示弱,自稱潮模獲品牌邀請,又寸爆對方年紀大,火藥味甚濃!

莊思敏以露背短裙現身活動,非常性感!

梁晶晶(左)與許穎獲品牌邀請出席活動,卻被莊思敏嫌棄。

莊思敏(Jacquelin)及「前港男」白健恩昨日一同出席時裝活動,大會邀得o靚模梁晶晶及許穎等行騷。活動前在微博上寫「秋風起,o靚模死」的Jacquelin,對於與o靚模同場表現反感,又拒絕合照,更連珠炮發地說:「我今日唔知邊個嚟!早幾日有朋友話我知,冇諗過書展後佢哋仲未消失,最好唔好同場。(拉低咗個水平?)一年衰過一年,佢哋嗰啲寫真相同宣傳手法好討厭!見到都唔想同佢哋打招呼,影合照時都有企開!(會唔會指點吓佢哋?)冇得救!(下次出席活動前會唔會問吓有咩人?)以前唔會,但依家要!(鬧佢哋?)冇得鬧,道不同,唔需要傾偈!」她表示不怕被指耍大牌,強調不喜歡「不注重衞生」的人,問到是否指「漏M模」孫旗,她續說:「我搞唔清,但都係嗰堆!」

自稱潮模有價值

不甘被「指摘」的梁晶晶亦不客氣地反駁:「我哋會彈番起,我哋唔只係o靚模,有品牌搵我哋做嘢,人哋叫我哋做潮模!(Jacquelin話唔想同你哋同場?)主辦單位搵得,證明我哋係有價值,不過佢係前輩年紀大,佢教我哋嘢惟有接受!」她又表示覺得委屈,因為自己十分大方!