人氣急升的「Cool魔」張智霖（Chilam）近日勁吸金，除獲蕭定一以八位數字羅致外，日前更被《好報》拍得現身渣甸山，偕太太袁詠儀睇2.2億元豪宅，又豪擲百萬購入名車，Chilam昨自稱傳統男人，並坦承有意明年入市：「買磚頭比較實際！」

自言是傳統男人的Chilam鍾意買磚頭投資，帶埋靚靚去睇樓。

試車一次唔夠，Chilam擇吉日換Casual Look再試過！

Chilam喺天台裝裝吓，視察附近環境。

Chilam試百萬新車，隨時入手。

張智霖（Chilam）近日憑無綫劇《衝上雲霄II》「Cool魔」一角人氣爆燈兼「聲價」十倍，起勢吸金的他一向投資有道，日前更被《好報》獨家踢爆與太太袁詠儀（靚靚），跟地產經紀到渣甸山布思道獨立屋睇樓。據知，該豪宅建築面積約4,400平方呎，包括五房、天台及車位，由於渣甸山屬名貴地段，是不少城中名人及富豪的居所，故市值高達2.2億元，可見Chilam的財力雄厚。Chilam昨日透過電話回應，他笑說：「咁都畀你哋識穿、見到？其實我係個好傳統嘅男人，所以我覺得投資買磚頭真係比較實際，尤其聽朋友講下年樓市會跌，咁咪諗住做定啲功課，睇吓出年有冇機會入市囉！（打算搬屋？）睇啱先再算啦。」

無綫期望「回巢」

愛車如命的Chilam，早前又被拍得到車行，先後試百萬新車CLK45 Benz及SL500 Benz，據知他已購入CLK45 Benz，對被慫恿一試的SL500 Benz亦愛不釋手。問到是否又買新車？Chilam說：「試啫，人生乜都要試吓。」

另外，有傳下月約滿澤東經理人公司的他，獲電影公司老闆蕭定一（阿一）以八位數酬金包3年的豐厚條件羅致「China 3D」旗下，無綫老闆陳國強卻有意以高價要求轉售。阿一昨日坦言曾聽聞無綫有意簽Chilam，但稱至今未有人聯絡他。

無綫外事部副總監曾醒明說：「據知佢一早名花有主，如果佢已經成為一間公司旗下藝人的話，嚟緊嘅日子同TVB合作我哋都歡迎，呢幾年佢同TVB合作無間，劇集成績都好突出，合作愉快。（同阿一爭？）以合約精神為主，機會唔大。（同阿一買合約？）未有呢個聽聞。」