麥玲玲 咀王敏德遭質問

玄學家麥玲玲昨日為維特健靈活關素拍攝廣告，她興奮地表示在新片《Delete愛人》中與型男王敏德（Michael）演夫妻，日前更拍攝親熱戲，她笑指被友人質問是否收買了導演：「我拖住佢成朝又哄到好埋，但就錫到嘅時候Michael問在場嘅王祖藍做咩唔嗌Cut！」她透露年底首度為TVB拍劇，與歐陽震華及萬綺雯合作，問到會否要求加感情線？她笑說：「梗係會！冇理由朱咪咪同蝦頭（楊詩敏）都有，我冇o架嘛！小儀都可以攬吳鎮宇啦！」提到曾批郭晶晶前日生BB會旺夫，玲玲表示若在這個農曆月份分娩，BB同樣人際關係好及運動天分高。