子珊敏之不和出晒面
徐子珊與陳敏之鬧不和傳足4年，牙齒印幾呎厚，今年卻再次碰頭，連拍兩套無綫新劇，可謂冤家路窄。昨日二人出席新劇記者會時，全程冇偈傾，各自搵伴吹水，互當透明，當梁靖琪「好心」出手，促成影大合照時，敏之和子珊即晒演技，有傾有講交足戲，但大合照後又打回原形，極速分開。
雖然勉強企埋合照，但敏之（左）眼尾都唔望，子珊則嘴藐藐。
定欣（右起）與子珊一起掩嘴開懷大笑，敏之則強顏歡笑，明顯唔啱Key。
Bosco被子珊（左）與定欣寸多緋聞，無奈地表示「得啖笑」迴避。
Toby好心做和事老，可惜事與願違。
演員大合照時，子珊與敏之一起拍手交戲。
傳不和的無綫花旦徐子珊與陳敏之冤家路窄，繼早前齊齊參演新劇《My盛Lady》後，再一起拍無綫新劇《點金勝手》，昨日二人出席《點》劇記者會時，全程零交流。她倆原是同門好姊妹，於2009年合作劇集《美麗高解像》期間，兩人一起游水，有指敏之放料給記者拍攝，令子珊不滿反目，其後更傳敏之拍《美》劇時更假戲真做掌摑子珊。事隔4年，她倆再次合作，更連拍攝兩套新劇，早前已有指敏之聯同《My》劇的王君馨合力抗子珊，如今顯見行動升級。
各自搵伴吹水
昨日她倆跟黃宗澤（Bosco）、梁靖琪（Toby）、黃智賢、江美儀及鄭俊弘等出席《點》劇的造型記者會，子珊跟敏之互當透明，完全冇傾偈，擺明唔妥對方。兩人各自搵其他人吹水，敏之全程黐實Toby密密斟，而子珊則埋定欣堆，有講有笑。
當敏之在台上介紹自己的角色時，子珊視而不見，眼尾亦冇望敏之，與定欣和Bosco細細聲密密吹水，敏之見狀即還擊，當子珊發言時同樣採取「睇唔到」策略。大合照時，二人為保持距離，找Toby站在她倆中間，未知Toby是否想做和事老，把敏之推到子珊旁。雖然牙齒印幾呎厚，但面對大批傳媒亦惟有即時交戲，面露笑容互相傾談，不過影完大合照後，二人即極速閃人，一個向左走，一個向右走，誓要保持距離。
唔玩姊弟戀
其後，子珊透露剛返港，早前在台灣跟型男柯震東及林依晨拍電影，提到柯震東愛年齡比他大的女生，問到有否過電？她即笑說︰「我唔鍾意弟弟，唔想參與對方嘅緋聞。」其後更藉機寸Bosco的緋聞比柯震東更多，似足「劏房」︰「佢（Bosco）係Non Stop，佢個版圖好似劏房，太多唔想參與。」談到曾跟對方傳緋聞，子珊即劃清界線，又笑指因Bosco有份參演令她曾考慮辭演︰「我只係路過，支持唔住。佢細過我，我唔鍾意細佬。」於劇中會假扮同性戀者的她稱跟Bosco及定欣有多場對手戲，並笑言跟定欣關係曖昧，寧揀定欣也不揀Bosco。
記者事後向陳敏之查詢，她以短訊回覆，否認與子珊不和，並表示對事件冇回應。
