Janice Man昨日身穿紅色樽領衫，塗上鮮紅色唇膏出席Anteprima活動。提到她與好姊妹Angelababy因曾傳不和而較少見面，日前卻一同到北京出席活動，問到有否約食飯？她說：「最後冇出去，我哋一齊喺房做腳底按摩，當日好攰，同埋我頭痛。」問到有否澄清誤會？她說：「都過咗咁耐，冇嘢。大家做朋友，有啲嘢唔需要講，人大咗睇開咗，唔會咁介懷，依家少見面，一見面就好開心。（幾耐冇兩個一齊？）之前有個共同朋友生日時見過，不過冇機會兩個人傾偈。」此外，她透露活動結束後會為母親舉行生日派對，更準備了一個特色蛋糕：「媽咪近年鍾意攝影，我特別買個立體相機蛋糕畀佢，希望下次親手整畀佢。」

Janice Man的一身紅衣打扮，明艷照人。

周美鳳（左起）、莊思敏、Janice Man、Jocelyn及Anthony齊齊出席活動。

同場的周美鳳透露會擔任鍾麗緹的經理人，替她接香港的工作：「暫時簽半年試吓，識咗佢十幾年，佢咁靚女又可愛，可塑性高。我未做過經理人，對我嚟講係一項挑戰。」