雨僑寸許亦妮執二攤
陳靜（DaDa）突然宣布閃退，令前港姐季軍許亦妮（Whitney）和雨僑登上電影《喜愛夜蒲3》女主角之位，昨日兩人趁《夜蒲3》舉行重新洗牌開鏡拜神儀式，除上演一場性感「胸」戰外，雨僑又出口術兩度暗示坐正，排擠Whitney外，又攝位逼退何佩瑜（Jeana）到後排之餘，連拍摸胸戲亦不介意！
以性感晚裝谷胸上陣的雨僑，兩度出口術暗示坐正做女主角。
Jeana穿上透視低胸裙，美好身材若隱若現。
除去皮褸的許亦妮狂晒四吋「事業線」。
原本Jeana站在許亦妮和雨僑的中間。
雨僑其後攝位成功，將Jeana逼退至後排。
心情勁High的雨僑，攬着王宗堯。
月初在微博突然宣布退出幕前的DaDa，逃拍電影《夜蒲3》，導演錢國偉一怒之下在十日內將角色重新編排，最後決定由許亦妮與雨僑擔正女主角，兩人眼見「女一號」之位懸空，趁電影進行重新洗牌開鏡拜神儀式，雙雙出口術爭做「女一號」！電影昨日在泳池邊舉行開鏡，「魔鬼胸」蔚雨芯、郭穎兒（Celia K.）及蕭美卡亦性感上陣，而Whitney和雨僑甫出場即上演性感大鬥法，以性感宮廷裝上陣的雨僑，谷胸大騷本錢，先贏一仗，令穿上皮褸遮胸的Whitney不甘示弱，即席除褸，陳柏宇亦看不過眼，主動出手解開其手袖鈕釦，令35D的Whitney即時解放，成功騷出四吋「事業線」！眼見現場激戰，Jeana亦不甘示弱，穿上透視V領裝真空上陣，大露南北半球，順道分一杯羹。
豁出拍摸胸戲
經過一輪「胸」戰後，好戲在後頭！Whitney在切燒豬時，未待其他演員埋位，便已氣定神閒企定頭排正中位置，而從後趕上的雨僑和Jeana則走到Whitney身旁，索性「身體力行」爭企位，不過雨僑出招將Jeana逼退至後排，成功奪得有利位置，與Whitney霸佔正中位置，排排企影大合照！
雨僑其後接受訪問時，暗示Whitney執其二攤及自己坐正：「佢（Whitney）之前都有參與嘅，我都想睇吓佢點演繹我原本做嘅角色。（你哋兩個邊個戲份多啲？）我都未Update劇本，但之前DaDa同韓國男模嘅溫泉大戰，依家變咗我做。」她更承認已應承拍攝摸胸戲：「導演有問我得唔得，我接受咗，床戲多咗。」
而Whitney則否認頂上DaDa「女一號」之位：「唔好咁講，梗係唔係啦！加咗啲戲啫！唔係咩取代，因為成個劇本都改咗！（怕成為公敵？）佢哋個個都咁靚女，又好身材，相信大家相處融洽。」她又否認與雨僑爭位：「唔覺，成班女仔都好努力拍一部電影，邊個做女主角都冇所謂。」
踢爆DaDa行蹤
而眼白白被雨僑逼到後排的Jeana，不甘風頭被搶，惟有踢爆DaDa行蹤，她透露曾與對方聯絡：「我同佢有聯絡，佢唔喺香港。（喺澳洲？）係，佢去嗰度放鬆心情，因為香港畀好大壓力佢，都支持佢，希望佢快啲返嚟！（DaDa知最後通牒限期？）佢知，但幾時返嚟都唔知！」
