一直有傳李嘉欣與奶奶關係欠佳，月前有報道指她與老公歐遊期間，把兒子交給姊姊照顧，亦不讓奶奶湊孫，嘉欣對此一笑置之，但指奶奶覺得辛苦，不愛湊孫。

消瘦不少的李嘉欣穿泰山裝登場，她指奶奶覺得辛苦，不喜歡湊孫。

嘉欣對於與奶奶不和之說得啖笑，老爺（中）及老公應該放心晒！

Jocelyn露背又騷半球，非常大方。

「大美人」一出，場面超墟冚。

陳祉妤穿貼身裙，纖腰現晒形。

林德信着到咁花俏，冧死女。

李嘉欣昨日身穿泰山裝擔任《SHISEIDO專門店開幕典禮》剪綵嘉賓，同場還有名模姚書軼、陳祉妤、Jocelyn夫婦和林德信等，Jocelyn更性感上陣，露出南北半球，相當吸睛！現場見嘉欣消瘦不少，她解釋正練習半空瑜伽，希望練出腹肌。問到會否與老公許晉亨一同做運動？她笑說：「我同教練講，做運動最怕見到老公，因為佢會問我點練，但又叫我小心斷骨，話會半身不遂，好煩！好彩佢冇要求同我一齊練。」

否認歐遊

提到近期有報道指她與老公早前歐遊期間，把兒子交給家姐照顧，也不讓奶奶湊孫，惟嘉欣否認歐遊：「冇去過，我都想去，連去街都少，之前趁暑假帶個仔去日本睇動物。囝囝畀人影到嗰日我喺屋企，可能（雜誌）缺我一張相。（如果你去旅行，個仔畀邊個湊？）次次旅行佢都跟我去。」但她亦坦承奶奶「麻麻哋」湊孫：「佢成日同我講：『見你咁辛苦，我以前湊仔就係咁！』（即係佢唔鍾意湊孫？）你話呢？辛苦過一次，仲會唔會想多一次呀？（係咪玩吓個孫就算？）奶奶成日對住孫仔重複手指指呢個動作，有日佢哋玩視像，囝囝就學嫲嫲手指指。」

拒「啤多件」

至於婆媳關係是否欠佳？嘉欣「唉」了一聲並說：「（情節）太過倫理，（新聞）比較舊少少。（冇呢啲問題？）我覺得係笑話一則。（奶奶成日畀人講到好惡咁，會唔會唔開心？）唔會，佢表情係咁，嚴肅啲，咁我到呢個年紀都係咁o架啦！」當談及會否考慮再生BB時，她說：「太殘酷，咁我六舊腹肌會變番一舊。」