陳庭欣泰打得

陳庭欣（Toby）雖然看似柔弱無力，但原來讀書時代曾是投球校隊，亦十分男仔頭，她表示可能因為爸爸是警察，小時候經常訓練她有關，不過Toby自從大學畢業後便甚少運動：「所以依家好冇氣，要Keep番，有次我出活動時抱起個小朋友，我已經揀個最細最輕嗰個嚟抱，不過都拉親筋，但又唔好意思出聲，所以原來出Function都要拉吓筋先嘅。」本來只打算做Gym的Toby，經好友翟威廉介紹下於4個月前跟陳志健（Otto）學拳，問到為甚麼會選擇泰拳？她說：「依家純粹想做運動收身。（做打女？）都好喎！順便可以防狼！（怕打到瘀晒？）怕o架！仲要着短裙，如果我知第二日要做嘢嘅話都會就住打，但Otto都會就住我嘅。」連「魔鬼教練」Otto亦大讚她：「佢雖然話自己調節力唔係咁好，不過其實佢OK，而且好勤力。」

讚嘟姐勁氣場

入行3年多的Toby工作大部分以司儀為主，雖然曝光率頗高，亦有相當知名度，但她卻自覺3年來沒甚進步：「我覺得時間過得好快，已經有人叫我師姐，但我覺得好似冇做過咩咁，冇乜特別嘅進步，入行嗰時因為突然要適應呢行就叫有啲進步，不過依家好似停咗喺度，而且公司有好多強勁嘅對手，個個都好厲害，要打有打，要一字馬有一字馬，要靚女有靚女，所以要不停鞭策自己。」她又希望在司儀界能有鄭裕玲的地位：「Do姐有道氣場，就算只係着T恤、牛仔褲行出嚟，個個都好敬仰佢，而且佢做MC用年輕人口脗又OK、正經又得，好多樣化，不過我知呢啲都一定要有時間同練歷。」

此外，她又大讚崔建邦是一個十分有記性、反應快的司儀：「我入行前對佢印象唔好，覺得佢係一個仔，好似懶勁咁，不過真正認識佢之後，就知佢唔係咁嘅人，覺得佢係好好嘅工作拍檔，佢依家有咩都會提醒我哋，佢都同我講過佢之前好慘、冇錢，要住劏房，我覺得好好彩有個前輩話咗啲經歷畀我哋知，唔使去到咁慘嘅時候先識醒覺知錯。」

拍拖唔畀老竇知

現年25歲的Toby還是單身，但她笑言已被朋友叫「中女」，問到有沒有追求者？她猶豫地說：「有啩！都唔知算唔算，係圈外人囉！不過我覺得佢唔啱我，我又唔啱佢，而且同圈外人拍拖好難，可能佢哋只係對我哋呢行好奇，所以先成日搵我傾偈，所以要分得好清楚。（擇偶條件？）高過我囉！我以前啲男朋友都唔高，同埋年紀唔好細過我，要大過我5年以內。（身形大隻？）OK呀！有安全感，其實最緊要佢鍾意我，同埋唔好有不良嗜好，其實已經好難搵，仲要明白我呢行。」她又大爆沒有想過結婚生仔：「我冇諗到咁遠，屋企人都唔想我咁早，以前我讀書時，一有男仔打嚟我屋企，Daddy就會問好多嘢。（分手都係因為Daddy？）之前拍拖係唔可以同佢講，佢永遠都係最後一個知，不過佢一知就好快分手，都唔知佢係咪喺我背後祈禱、求神，可能我係獨生女，會緊張啲。」Toby又透露任職警察的爸爸快將退休，孝順的她打算跟朋友一起開一間日式餐廳，讓爸爸「打骰」。