李綺雯身形嬌滴滴，看似弱不禁風，但原來非常捱得，即使拍攝節目時要面對最怕的鳥類或需幫忙搬重的器材，她也永不Say No！入行十年，綺雯的目標並非攀上一線，反而對於現時當綠葉的定位自得其樂！

李綺雯只希望做好自己，並不介意做綠葉。

吳君如是綺雯最欣賞的藝人，因她為了拍攝效果不惜醜化自己。

最怕雀鳥的綺雯，試過到孔雀園拍攝旅遊節目時令她驚到喊！

李綺雯雖然人仔細細，但卻非常捱得，試過拍攝旅遊節目時要她接觸最怕的鳥類，她也沒有Say No，反而頂硬上：「有次喺亞視拍《粵港越好玩》，我要去內地孔雀園拍嘢，啲孔雀仲要冇嘢攔住，周圍走，搞到我好驚，我仲拍到喊添！我直程係跳咗去我同事嘅背脊，叫佢孭住我拍！」

除要克服弱點外，綺雯亦坦言以前跟攝製隊進入山洞拍攝時，都要幫忙拿攝影器材：「有次拍旅遊節目要去山洞進行拍攝，去之前要行一段好長嘅路。雖然我係女仔，但我都會幫手拎一盞好重嘅燈，真係好重！又有一次我去做雅典奧運，有段時間經常去滑浪風帆場地日曬雨淋，當時李麗珊一見到我就話：『嘩，你做乜曬到好似我咁黑？』所以我諗自己都幾捱得！」

欣賞吳君如夠專業

入行十年，綺雯在劇集中雖大多扮演陪襯角色，不過她並沒有怨天尤人，反而樂於做綠葉：「我一向都清楚自己條路，我唔係靚女或者乖乖女，所以唔會行小花路線，反而係做綠葉。對我嚟講，我從來都只係想做好自己嘅角色，多於做一個主角或者要紅！」問到最想倣效的對象是誰？她即表示是吳君如：「我覺得君如好專業，因為佢唔係一定要行靚女路線，而且亦願意放低同醜化自己，去令部戲好睇，所以我都好欣賞佢！」