劉青雲、古天樂、吳彥祖及周迅前晚出席電影煞科宴，周迅近日先後與謝霆鋒及梁朝偉傳緋聞，而緋聞後首次見人的她明顯有備而來，簡短以兩句話來否認，當記者欲再追問時，她已經封口離座拒再談兩位緋聞男友！

不欲多談的周迅對緋聞輕描淡寫。

周迅與三大型男劉青雲、古天樂及吳彥祖同台，認真羨煞旁人！

型男劉青雲、古天樂及吳彥祖與周迅前晚出席電影《竊聽風雲3》煞科記者會，周迅最近分別與霆鋒和偉仔傳緋聞，而她受訪時明顯早有準備，自稱早知記者會問：「我兩句就可以交代晒，第一，我今次嚟香港唔係為咗梁朝偉，而係為拍電影，第二我拍完戲聽日就走，亦唔係為咗要避開同謝霆鋒嘅緋聞，係要去拍電視劇！」問到是否和霆鋒住在同一大廈時，她點頭承認：「係，都有碰過面。」問到廚藝了得的霆鋒有否邀請她回家吃飯時，她說：「冇！（你哋拍拖？）唔係，係朋友。（冇機會一齊？）已經講咗，唔講喇！（知霆鋒搬屋？）知！（下一部戲會同佢合作？）係。」當記者想再問詳情時，她已經站起雙手合十說：「我已經講完，OK，多謝！」

青雲幫手美白

至於曬到變「黑炭」的古仔笑言最大得着是令周迅更顯美白：「佢企喺我隔籬就得，美白產品都唔使用，好彩我對手劉青雲都係一個黑人。」他透露與剛為人父的吳彥祖話題總是圍繞其女兒：「都打算遲啲買嘢畀佢個女。（羨慕佢有個女？）比羨慕更羨慕！（想生番個？）係鍾意小朋友，但都要睇時間啱先得o架。（依家啱？）幾點呀依家？通常呢啲都係夜晚發生。」