Sam哥「劇透」結局一鑊熟
日前「Sam哥」吳鎮宇驚爆《衝上雲霄II》大結局，是劇中全家一鑊熟魂斷九霄，從此可以「雲外看、新生趣」！雖然此安排網民Like爆，但昨日Sam哥解畫此「劇透」純屬搞笑！真正結局其實一切「都似」預期，有情人成雙成對，惟溝女王Cool魔成寡佬！
久違了的法拉投入宣傳，更搞笑地擺甫士襯巴黎鐵塔畫板。
羅仲謙、胡定欣（左一、二）及鎮宇（右）看到吳卓羲被胸襲，笑不攏嘴。
阮小儀向張智霖獻吻，鎮宇笑到肚攣。
無綫熱播劇《衝上雲霄II》話題日日新鮮，日前由「Sam哥」吳鎮宇在內地受訪驚爆結局乃全家一鑊熟！當日鎮宇「劇透」結局，是眾人開心飛馬爾代夫旅行，卻遇空難，他更「認真地」於訪問中為此結局默哀三秒鐘，並指與劇迷將不會在《衝III》再見，講到「似層層」。
Cool魔最終變寡佬
如此「估你唔到」大結局，有別無綫一貫合家歡模式，令網民大感雀躍。鎮宇昨日與「Holiday」陳法拉及「Cool魔」張智霖等到九龍城香港飛行總會宣傳劇集，對於早前自爆結局冚家一鑊熟，鎮宇笑說：「啲人問我結局，邊有咁多劇透吖，咪隨便作一個最冇可能發生嘅結局，咁都有人信？好冇幽默感。」他又謂結局若真的如此，收視可能真的會衝上100點。
法拉歸隊紅酒宴客
據知，《衝II》結局離不開有情人終成眷屬，Sam哥配Holiday，「Issac」吳卓羲與「夏晨」胡杏兒兜兜轉轉亦成一對，反而溝女王Cool魔卻未有着。另外，日前播出Sam哥解開心結的一集收視亦達33點，鎮宇未敢邀功：「我都唔記得做過咩啦，電腦技術好，大家畀面！」他又否認報道指他軍訓式教仔，亦未有為此動氣，更笑說自己一向都紅，人紅是非多。
另外，法拉在微博取笑鎮宇「驚爆」結局：「Sam哥說的話大家要相信，鎮宇哥說的話信一半就夠了。」而自劇集開播以來，她昨日首次參加宣傳，表示已準備請同事食飯，並會分享在美國拍賣投得的70年代靚紅酒。問到何時返美讀書，她說：「未定，學校想我繼續讀。好多謝呢個劇帶挈咗好多工作！」她坦承正物色劇本，有英語及普通話劇，但並非傳聞中的十多個：「暫時係自由身接工作，心情輕鬆，冇工作壓力。」
