娜姐寸Avis溝女如曱甴生蛋

自今年1月周秀娜狠撇陳偉成（Avis）後，Avis一直自言修心養性，但昨日陳蕊蕊驚爆與對方的半年地下情玩完，並直斥Avis花心，但男方誓神劈願冇同蕊蕊拍過拖，分手鬧劇被娜姐形容為「曱甴生蛋」唔得閒理！

有傳蕊蕊與Avis早已暗撻半年，時間巧合成了疑似娜姐與Avis分手時的「小三」。而蕊蕊於7月時曾在微博轉載Avis的感性錄音對白，足見雙方有互相留意。然而，昨日蕊蕊突然在微博中自言識錯人，留言道：「我都做錯很（多）事，最錯是識了你、信了你，點解你可以咁假，原來你做戲咁叻。」未幾她又再度留言：「其實你溝女你嘅事，但不用做到這樣吧，麻煩你積吓口德。不要再中傷我。」巧合是Avis前晚曾在微博懺悔：「做錯了一件事，真心說聲對不起，以後不會再做，是因為知錯和後悔做錯事。」

斷絕聯絡

昨日記者致電蕊蕊問到甩拖一事，她大感愕然全程支吾以對：「我依家冇拍拖。（畀人呃？）唔算呃！（分咗手？）係！分咗手先知佢好多嘢呃我。（佢一腳踏幾船？）唔敢講，唉！我都唔係咁清楚佢啲嘢。（有冇問過佢？）大家冇聯絡好耐。」此時，記者再直問她是否曾與Avis拍拖，她承認此事說：「我識佢好耐。（Avis同娜姐分手你哋先一齊？）我今年先識佢。（Avis花心？）其實都係！同佢分咗手之後，先喺朋友口中得知佢好多嘢。（知啲咩？）過咗去唔想再講。（你喺微博鬧佢？）因為聽完朋友講啲嘢之後真係嬲嬲哋！（佢喺微博同你道歉？）哼！可能唔係對我認錯呢！」

男主角呼冤

對於蕊蕊直認與Avis暗交半年甩拖，娜姐先透過經理人回應：「曱甴生蛋有幾奇！一胎幾百隻，次次出嚟回應咪好唔得閒。」對舊愛絲毫不留情面的娜姐，其後再透過電話接受訪問，問到蕊蕊是否導致她與Avis分手的「小三」？她說：「過咗去嘅嘢唔記得晒啦！就連幾時分手我都唔係好記得！（Avis花心？）No Comment！（同Avis仲有冇聯絡？）冇！」

至於男主角Avis，對於與蕊蕊拍拖一事呼冤，自言相識兩年，並非對方所講的半年，但雙方從未單獨見面，他誓神劈願說：「冇！總之冇拍拖！（畀人屈？）把口生喺人哋度！我聽到都忟！人哋做宣傳我冇回應！」他又為微博「懺悔」內容解畫，指致歉對象是其生意夥伴，因自己一時疏忽招致金錢損失。