袁詠儀主演的內地劇集正在熱播，卻被剪得支離破碎，令一眾Fans睇得一頭霧水，紛紛於微博留言投訴。身為當事人的靚靚大智若愚，打趣地回應：「好耐冇試過演嘅角色有咁大嘅回響喇！況且畀人話吓又唔會冇咗忽肉！」

袁詠儀（靚靚）一向鮮有飾演奸角，但最近於內地劇《龍門鏢局》內卻勇於接受挑戰，令不少粉絲引頸以待。最近《龍》劇於內地四個電視台熱播，可惜由於客串明星陣容鼎盛，加上片長關係，劇情被刪剪得支離破碎，在缺乏合理的交代下，靚靚突然被安排與一名男角「撻着」，令觀眾看得不明所以，紛紛在網上留言鬧爆，有粉絲則擔心靚靚會因而不開心，紛紛留言安慰。投資方有見及此，便游說靚靚度期補戲，希望接下來的劇情能「言之有物」，以安撫一眾戲迷。

與老公享受日光浴

至於身在香港的靚靚由於網絡問題，卻從未欣賞自己的演出，當看到粉絲的留言時不明所以，惟有致電相關製作人了解，及後她於微博留言安慰粉絲，表示心情沒有受到影響，更上載一張與老公張智霖享受日光浴的寫意照。

事後她接受電話訪問時笑說：「我幾開心呀！佢哋鬧都係鬧秋月（其角色名字），又唔係鬧袁詠儀！好耐冇試過演嘅角色咁有回響，咪畀『Cool魔』以為佢威晒！好似劉嘉玲話齋，畀人話吓又唔會少忽肉嘅！（投資方斟你返去補戲？）如果令劇情更加圓滿嘅話，我係相當樂意嘅！」由於四個電台分別剪輯了四個版本，靚靚說：「有啲剪得詳細啲，有啲又冇咁多解釋，劇迷唔明係可以理解嘅。不過製作人話年尾將會有個足本版喺網上播出，到時大家睇完先再決定鬧唔鬧啦！」