Super Girls 畫出少女夢
女子組合Super Girls（SG）打着跳唱組合的頭銜，在台上施展渾身解數，又跳又唱非常吸睛；台下卻是文靜甜姐兒，畫畫、彈結他、化妝及跳芭蕾舞樣樣齊，可謂「周身刀，張張利」，絕對Girlfriend-able！
Super Girls周身刀張張利，除彈結他和畫畫外，有成員更精於化妝和跳芭蕾舞。
Cheronna除了彈結他外，亦喜歡將親手繪畫的畫作送給友人做賀禮。
Yanny畫風Cutie，題材包括減肥化妝和生活勵志小貼士等。
除了唱得跳得外，Super Girls的畫功亦相當不俗。
主修形象設計的Heidi（右）幫Aka化大眼妝，更是SG中的形象顧問。
組合Super Girls（SG）的Yanny及Jessica均是畫畫高手，但畫風迥異，無論是Cutie少女風、花系少女風抑或搞鬼卡通風，兩人均得心應手，隨手便有一幅作品出爐，難怪兩人的畫作可鋪滿幾張枱。愛以少女生活做主題的Yanny，畫風特別Cutie，由少女最關注的減肥化妝，到生活勵志小貼士，都是她愛選用的題材，Yanny說：「之前我就幫SG設計咗Q版貼紙回饋Fans，因為自己諗法多，鍾意加入自己嘅創作，例如我鍾意用黃黃哋嘅紙畫畫，畫出嚟嘅畫就更加有感覺，又可以帶出唔同嘅訊息，比以前修Art、素描有更多創作空間。」
「花系少女」Jessica則愛以不同類型的鮮花作主題，更愛以藍、紫色做主調，畫出自己的獨特風格，她說：「其實我係入行之後先開始畫畫，因為可以令人心境平靜，但我畫畫有個特別習慣，就係畫完要用電話影低，先會睇到邊度要改善。」
速成學彈結他
至於有份參演劇集《M Club》（前名《Aerobic Girls舞室保衛戰》的Cheronna是隊中的結他女孩，以半年時間極速學會彈結他，全靠日夜苦練，她說：「我晚晚都會練結他，都係上網搵片同樂譜自學，當係學吓新歌裝備自己，自我增值，將來隨時都可以拎出嚟表演。」而身為Sponge Bob迷的Cheronna，原來閒時亦愛畫畫，重質不重量，獨沽一味只畫海綿寶寶，又「私藏」一本已有四年歷史的自家畫冊，就連早前好友結婚，亦以親自繪畫的海綿寶寶畫作做賀禮。
Heidi幫隊友扮靚
同樣有份拍攝《M Club》的Heidi，主修形象設計及化妝，今年剛畢業的她更是隊中的形象顧問，為自己執到正之餘，亦幫隊友扮靚化妝，她說：「以前要交形象設計功課嘅時候，我都會叫其他SG成員做我Model，好似Aka就啱化大眼妝，Yanny就好啱中國風造型。我哋幾個女仔啱啱出道時，唔係咁識化妝，我就會幫佢哋黐假眼睫毛，仲會圍埋傾化妝品經。」
另外，擁有一雙長腿的Aka，原來是「芭蕾氣質女」，小一便開始學芭蕾舞至中七，一學便學足13年。她入行前是芭蕾舞老師，難怪舉手投足均散發優雅氣質，但她指「芭蕾底」令她大呼頭痛：「雖然芭蕾舞可以訓練一個人嘅儀態同塑身，但個感覺好難搣甩，尤其依家我哋跳K-Pop，成日畀排舞老師嫌棄，成日話我跳得好娘，要畀多啲心機搵個平衡點。同埋以前跳得芭蕾舞多，跳到對腳好粗，不過依家冇跳好耐，對腳先幼番晒。」
