陳宛蔚鬧爆DaDa冇承擔

陳靜（DaDa）一句工作壓力大而退出「辣慶」成村人，她已答應接拍的電影《喜愛夜蒲3》，日前已完成開鏡儀式，不料幾日後DaDa卻表示「退出」，完全沒有向導演錢國偉及監製伍健雄交代和解釋，令到二人愁爆如何處理即將開拍的DaDa戲份。而錢國偉女友陳宛蔚率先在微博鬧爆DaDa，為男友出氣：「初初看似很可惜，但想真點，真的有點不忿，看着這些人，成名得來得太容易了，機會也自然地放棄得瀟灑輕鬆！說直點，這是甚麼工作態度？一句話有工作壓力，就不用對別人、工作夥伴負責任吧？電影拍攝得如火如荼，怎能走了去？整個劇組點算？女主角找誰做？沒承擔的人真的做不了大事，做回平凡人比較適合！」

召開緊急會議

而伍健雄昨日表示正與錢國偉召開緊急會議急謀對策，他說：「好頭痛！連施念慈都搵佢唔到，我哋都唔會搵到，星期日戲份就有DaDa，所以要開緊急會議，同錢國偉傾傾！（另搵女角頂替？）嚟得太急，一切都未決定！」因DaDa的退出，令其有份主演的電影《重口味》亦成為「受害者」。然而，任性的DaDa卻獲《夜蒲》拍檔齊聲力撐，舊愛王宗堯直言覺得意外：「我識嘅佢係有少少脾氣，佢攞獎前都已經畀好大壓力自己，背負好多責任，可能佢情緒未處理得好，所以都唔好當真，但如果佢真係選擇做普通人，會祝福佢。」緋聞男友李雨陽及好友沈震軒則認為做人最緊要開心，李雨陽說：「我都傳咗短訊問候佢，希望佢開心，如果真係唔開心，想行開吓都冇所謂，佢依家先24歲仲後生，就算佢10年後返嚟都只係30幾歲啫！」沈震軒說：「做得藝人都預咗會成為大家茶餘飯後嘅話題，食得鹹魚抵得渴，壓力一定有，希望佢可以將壓力變成正面。」至於連詩雅亦感可惜：「如果真係退出都會祝福佢。」