DaDa出口術藐走Mika
因在金像獎中得獎而「升呢」的陳靜（DaDa），昨日帶同兩位師妹郭穎兒（Celia K.）及蕭美卡（Mika）出席新片開鏡儀式時，竟出口術趕走唔埋自己堆的小師妹Mika，不准對方一同做訪問！獲DaDa「御准」留低的Celia K.，事後寸爆Mika只是新人！
Mika加盟DaDa所屬公司後未有乖乖埋堆，反而黐着另一嫩模Iris，引起DaDa不滿。
Mika
DaDa（中）以「三個人做訪問太多」為由，開到口叫Mika（左）「彈開」。
嘴藐藐
Mika懵盛盛唔「彈開」，DaDa（右）即時藐爆，唔妥到出面。
再發功
DaDa（中）擺「阿姐」款與助手密斟，助手即醒水拉走Mika。
尷尬走
被「請走」的Mika又瘀又冇癮，只懂尷尬傻笑！
自今年4月當選香港金像獎最佳女配角後，陳靜（DaDa）即時「升呢」，最近更帶挈師妹Celia K.及Mika參演新片《喜愛夜蒲3》。昨日舉行的開鏡儀式上，三人與文凱玲、「寸嘴Barbie」夏尉喻及雨僑等齊齊谷胸，以「事業線」互片！
搣甩「o靚模」稱號的DaDa似乎有心建立威望，進一步鞏固在公司中的「一姐」地位，當與Celia K.及Mika準備受訪之際，她竟突然開口踢走小師妹Mika︰「3個人做訪問太多，我同Celia K.兩個做咗先。」擺出「大家姐」架子！懵盛盛的Mika呆企未有即時「彈開」，最終被公司助手拉走，場面尷尬！據知，與DaDa相識多年的Celia K.屬「DaDa派」，而Mika自今年加盟後未有埋DaDa堆，反而黐實「爆E超蓮」鍾采羲（Iris），引起大師姐DaDa不滿，今次拉埋Celia K.受訪明顯想益自己友。
Celia寸過瘦唔好睇
有得「留低」的Celia K.昨日接受電話訪問時寸爆Mika只是新人，說時語氣相當得戚︰「可能我入咗行一段時間，比較清楚佢（DaDa）嘅嘢，一齊做訪問有默契。我唔係新人，可能佢想畀機會新人自己發揮呢！」她直認與Mika沒有交情，並以「同事」稱呼對方︰「我同DaDa識咗8年，係朋友兼同事，佢只係新入公司嘅同事，如果要了解，等忙埋先啦！」問到是否杯葛Mika，她未有否認，繼續寸嘴說︰「每個人都會經歷新人時期，冇咁多人識，訪問係少啲。」談及對Mika的印象，她說︰「好瘦！叫佢食多啲嘢，咁樣唔好睇。」
至於Mika則在電話中死撐沒有被杯葛︰「我唔覺得佢哋唔鍾意我，始終同一間公司，我希望大師姐好錫我，公司其他女仔都係。」問到是否因冇埋DaDa堆才被Out，她說：「其實Iris同個個都熟，我只係出寫真前經常請教佢意見，我都希望之後有機會同DaDa同Celia K.食飯，增進感情。」
