小方施熊抱DaDa髀你摸

方力申、雨僑、陳靜、余文樂和曾國祥等前晚錄影無綫節目《超級無敵獎門人終極篇》，小方多年前錄影《美女廚房》時已被批評望向女嘉賓的眼神曖昧，這次上獎門人又因玩得太投入，「神之手」觸及DaDa大髀內側的敏感部位亦不自知，惹來鹹豬手疑雲。

事緣在經典遊戲「障礙賽」中，方力申、小肥、雨僑與DaDa一組，首先由小肥行石春路，其後到小方低頭扮象鼻轉圈，再合力將DaDa拋高再掟落地壓爆氣球。由於小方玩得太投入，第一次抱起DaDa時，竟一隻手攔腰抱起DaDa，另一隻則托住DaDa大髀，雖然小方未有觸及DaDa上圍，但卻因過分肉緊，竟觸及DaDa大髀內側的敏感部位！

至於DaDa亦同樣因過分投入而對被摸蝕懵然不知，更投入地張大朱唇作緊張狀！雖然兩位主角百分百投入，可惜卻未能一次過成功，惟有從頭來過，小方這次聯同雨僑及小肥將DaDa抱起再掟高，期間小肥亦觸及DaDa大髀內側，只是位置未及小方觸及的尷尬。雖然已合眾人之力，不過DaDa依然未能壓爆氣球，最後要用肚皮壓爆氣球才告成功，場面搞笑。

冇為「咪咪」買保險

事後DaDa表示不覺得小方觸及敏感部位，並坦言即使觸及亦不會介意：「好多遊戲都夾手夾腳玩，碰撞少不免，掂到都唔係有心，嗰時梗係唔知，只係掛住玩同擔心整親。錢嘉樂都有教我哋點保護自己，仲好開心贏咗獎品。」問到DaDa如何弄破氣球時，她說：「我都唔知邊個位壓爆個波，總之落地就周身痛。」她又謂自己真材實料，不會為「咪咪」購買保險：「除非之前受過傷，怕整親舊患先會買。」　　在另一個遊戲「真心話」中，獎門人曾志偉問到「你遇過嘅最極品賤人」時，小方竟開名自爆曾被前輩葛民輝欺負：「有次拍戲，幾個男仔瞓喺張床度，點知隔籬個男仔除咗對襪，塞落我個口度，嗰個人就係葛民輝。」獎門人及獎老為免現場氣氛尷尬，即為小方「打圓場」：「你爆得出嚟，你同佢好Friend喎！」

否認與Stephy秘婚

由於近日盛傳小方與女友鄧麗欣（Stephy）已於沖繩秘密結婚，小方即時否認：「結婚我一定唔會秘密，但會考慮喺外國註冊，因為好鍾意英國古堡，亦都好鍾意馬爾代夫陽光與海灘，但一定會擺酒，因為我有太多朋友。」問到有否與Stephy商量？他笑說：「我哋呢啲浪漫嘅人，結婚唔使講啦！有衝動先有驚喜o架嘛！（未諗清楚？）未呀！（未認定Stephy？）係我未諗清楚點搞婚禮啫！」記者再三追問是否未認定Stephy時，他即避而不談，並謂希望大家不要給予壓力。