鄭俊弘李璧琦 Sing夢奇緣

有別於曾屬戰友的Fred，李璧琦（Becky）參加《星夢傳奇》並非為了讓人「行到出街，人哋見到我，就可以講得出我個名」，亦非一唱成名天下知，而是希望身邊人睇清自己那一顆愛音樂的心：「我未參加呢個比賽之前，就已經同身邊人講：『唱歌係我嘅理想！』但身邊人可能淨係記得我係演員、主持，覺得我只係吹水，所以依家輸咗反而仲好，我可以大大聲同人講：『我冇講大話！唔係為咗配合節目而亂噏吹水，係真心鍾意音樂！』」

天生擁有一把靚聲的Becky，為了證明真心熱愛音樂，從小就不理母親反對，多次偷偷參加音樂比賽，贏得無數獎項，又試過一星期內瘋狂補習五天來賺取報讀美國大學音樂學院的報名費，更曾順利打入新秀比賽十強，「戰績」可謂相當彪炳。今年她再一次順着心願報名參加《星》，就在所有人以為她能夠在《星》大放異彩時，突如其來的失準，嚇壞所有人亦嚇窒自己，Becky形容一切失了預算：「就好似練咗四年嘅俄羅斯體操選手，你出場比賽嗰陣以為一定冇問題，點知上到去鞍馬，突然跌咗落嚟，就算幾有經驗都好，落到場冇任何嘢可以保證冇意外，所以嗰一下我呆咗，心諗：『頭先唱歌嗰個人係邊個？』」原來，一直以來靠音樂比賽來肯定自我的Becky，在一次嚴重失準後，竟然認不出自己。

輸比賽贏學生心

但慶幸的是Becky獲得一班學生施冧招，成功感動她繼續邁向音樂夢：「一路以嚟都教緊學生音樂，輸咗嗰刻最擔心唔係自己，而係唔知點面對佢哋，當我向學生講晒成個落敗經過，問咗一句：『你哋會唔會唔想上我堂喇？』佢哋竟然同我講：『傻妹嚟o架！我哋識咗你咁耐，點會因為一個比賽就唔做你學生。』搞到我眼濕濕，心情好快平復番，依家決定繼續教音樂！」雖然Becky在《星》被Out走，但過程中卻得多於失。

縱然現在已成為《星》的局外人，但Becky仍非常留意比賽進展，談到最欣賞的參賽者，她毫不猶豫地稱讚Fred：「我睇好Fredo架！見佢一路比賽嘅穩定性都好強，只要一路Keep住，我有信心佢會贏到冠軍，同埋依家應該有好多機會等Fred試，可以有更多發揮嘅空間。」Becky輸得起，放得低，縱使落敗，仍甚具大將之風。

沒想到鄭俊弘（Fred）憑一曲《時代曲》，唱出「只想唱一闋歌，叫你認清楚我……」，即有萬千觀眾對他齊聲高呼：「鄭俊弘，我認得你！」Fred入行12年，參加新秀後立志成為歌手，以為簽下唱片公司便可一展歌喉，誰知遇上公司轉型，被棄置一旁，輾轉加入無綫藝員訓練班做演員，渴望在影視圈一展拳腳，卻苦無代表作，最令人記得的，反而是多年後的歌唱節目─《星夢傳奇》，或許這就是命運。

從Fred在比賽唱出第一首歌後，他就恍如「長勝將軍」，愈戰愈勇！不但贏唱歌，更贏得觀眾的認同。不過，自認「謙虛底」的他卻不囂張：「其實你有乜嘢值得囂呢？你係邊個啫，喺我眼入面係冇『囂』呢件事！我每一日就係懷着一種感激嘅心情開始每一日！」Fred由寂寂無聞，一躍成為行過街市買棵葱，都會有人排隊要求合照的萬人迷。面對如此轉變，難怪他每天的心情都如陽光般燦爛：「見到佢哋搵我合照，真係好開心！可能以前啲人見到我，唔會主動嗌我，大多會話：『咦，咁熟口面嘅，係咪……』不過依家就會有人主動同我講加油，仲記得有次搭車去坑口轉車返公司，有位Auntie同我傾咗幾句，之後我喺微博收到佢個女Send畀我嘅Message話：『我媽咪同你傾完偈，開心咗一日呀！』睇完真係覺得好窩心、好親切！」

Enjoy表演過程

每提到粉絲的愛，Fred便打從心底笑出來，如此童心未泯，令人質疑眼前這位大男孩是否真的嚟緊「三張嘢」？不過唔講唔知，Fred雖然唱功了得，但他這次參加《星》也是經過反覆思量，還拖到最後一刻才遞上報名表：「其實我諗咗好耐，因為我覺得歌唱比賽已經歷過，所以唔需要再去參加，反而諗不如專注拍劇啦！不過我有朋友同我講Nothing To Lose，叫我試吓！結果我喺最後一日、最後一個鐘先交報名表格。」贏在起跑線，Fred卻從沒想過要贏，反而選擇Enjoy The Show：「其實有一集，我覺得自己一定Out梗！但若然被Out，不如豁出去，結果我拎住支木結他唱想唱嘅歌，真係好Enjoy嗰兩分幾鐘，覺得自己好似斷片咁，唔知做緊乜！」

Fred熱愛音樂的程度是毋庸置疑的，連一個人行幾步路、講幾句話都哼一哼歌，實在令人佩服！從來沒有計較，可能收穫遠超想像。Fred，抵咁多人認得你！