陳奕迅派Dislike寸歌迷

陳奕迅共25場的《Johnnie Walker Eason's LIFE演唱會》前晚終於完美落幕，Eason老婆徐濠縈及爸爸陳裘大繼續捧場。Eason在台上毫不留力，先使出「蜈蚣彈」，又瞓在台邊與台下歌迷握手，睇見都一額汗！Eason向來無話不歡，但前24場為養住靚聲，在台上未有太多話說，但大情大性的他前晚開尾場時終抑壓不住「吹神」本色！Eason在快歌跳舞環節時見台下觀眾不願起身跳舞，隨即跪地說：「皇上請起、再請、一請、二請、三請。」但歌迷仍無動於衷，他笑說：「原來跛嘅！」

「搶」粉絲手機

Eason演唱慢歌時台下有觀眾不停依嘩鬼叫，他在演唱《陀飛輪》前呼籲歌迷保持安靜，但仍有人當「耳邊風」，大叫「Eason」及「Joey」，Eason即指住自己的頭，暗寸歌迷的腦袋有問題！其後他走近台邊，歌迷紛紛拿起手機影相，他見狀即後退幾步，做出手指公向下的手勢。至Encore部分，Eason自彈自唱《床頭床尾》，並表示是點給場內的情侶及夫婦，更有感而發：「你哋真係要戒吓，唱慢歌要尊重台上嘅人，唔好叫，有嘢就入廁所，對住馬桶點搞都得，唔高興就搵地方去解決。」及至握手環節，他拿起女歌迷的手機假裝掟落台，並說：「唔知幾時我哋唔再用眼睛，係咪Upload嘢上網咁緊要？你哋鍾意影，我就做呢個動作（手指公向下）。」自知過了火位的他隨即打圓場：「人愈大就多說話，唔緊要，我有一排唔會喺香港開騷，我係世界級o架！我識章子怡，章子怡坐我隔籬（指在《中國最強音》擔任評判），仲唔係『國際級』、『國際章』？」

完場認心情唔靚

Eason完騷後出席慶功，問到自彈自唱《床頭床尾》，是否唱給台下的老婆聽？他說：「我冇講過，感情事唔講，包括謝霆鋒同周迅。（係真定假？）佢兩個都係我好朋友，但我覺得唔係囉！（報道話霆鋒搬屋？）係咩？我同佢嘅友情係唔講私事嘅。」提到有報道指他患有人群恐懼症及躁鬱症，搞鬼的Eason笑笑口說：「我喺香港就有『非洲人群恐懼症』，喺外地就有『華人人群恐懼症』，可能我其中一晚有講過呢啲。（即係報道啱？）係呀，照實報道呀！照實呀！（使唔使睇醫生？）咁又唔使！」提到在台上有感而發，他坦言心情略為差。此外，提到10年前的《衝上雲霄》主題曲《歲月如歌》是他主唱，問到可有聽過林子祥的《衝上雲霄Ⅱ》主題曲？Eason說：「當我上年知道拍第2集，見第1集咁成功都有自薦過，但嗰時『四大』問題未搞掂。（有聽過？）有，覺得幾好聽。」

另外，對於Eason在演唱會自爆有躁鬱症，徐濠縈昨日透過電話回應：「做藝人情緒係易波動，多做運動會好啲。（佢發牢騷叫歌迷咪影相？）歌迷咪再影啦！錯過欣賞歌曲，有時睇音樂劇都唔畀影。（會陪老公旅行？）會放假。」