娜姐(舌累)飯應

周秀娜由於近日拍攝旅遊節目時發生意外，導致「趾公」不幸骨折並返港療傷。適逢其緋聞男友、曼聯鐵衞里奧費迪南（Rio Ferdinand）前日隨球隊訪港，並於抵港當晚即心急夜會娜姐。記者昨日致電娜姐，她表示原本費迪南已在蘭桂坊一間夜店預訂座位，準備與她相見，但因娜姐腳趾仍有傷，擔心她會被「踩親」，故改到費迪南下榻的酒店咖啡店會面，費迪南幫娜姐視察傷勢之餘，還叮囑她愛惜「趾公」：「佢一見到我就即刻問我腳趾傷勢，又話傷勢嚴重，叫我小心。仲同我分享佢嘅受傷經驗，教我療傷同叫我愛惜腳趾公，好多謝佢指點迷津。」

叫食多啲嘢增肥

娜姐又謂兩人雖然相識一段日子，但仍只限「網交」，未曾真正見面，娜姐指費迪南甫見到她後，即指她太瘦和太「細粒」：「佢叫我食多啲嘢增肥。」娜姐表示費迪南對日本菜情有獨鍾，今次跟對方相見，大半時間都是談「食經」，甚為投緣。她還透露費迪南邀請她8月到英國看他比賽：「佢約我下個月（8月9日）去英國捧佢場，原來下個月係佢加入曼聯第10年，所以會有紀念賽。」她更笑言費迪南會包機票及入場票等。問到會否赴約？她說：「舌累飯應！佢仲話要帶我食薯條，順便谷肥我，但我忙於拍劇，要度期。」問到是否有機會發展，她說：「我哋筆友嚟咋！」

初次跟娜姐會面，費迪南就送禮物，娜姐說：「佢送咗佢戴住飛咗半個地球嘅帽畀我。（你有送嘢畀佢？）冇呀！之前我出寫真、紀念品嗰時，有咩都寄畀佢。」她又謂前晚以簡單的英語跟對方溝通，談得甚為愉快，問到可有談合作，她表示僅是閒話家常，而費迪南昨晨亦在微博上載他跟娜姐及其他友人的合照。

傑斯出席私人聚會

此外，「紅魔鬼」曼聯一班球星包括前鋒尹佩斯（Robin Van Persie）、中堅里奧費迪南及中場卡域克（Micheal Carrick）等前晚到中環歎高級日本菜，其後登上旅遊巴返酒店休息。而球星傑斯（Ryan Giggs）、尹佩斯及卡域克昨午約四時十五分離開酒店，到跑馬地馬場出席私人聚會，並逗留了約半小時。

據知，眾球星返酒店後，本來安排與粉絲見面及簽名，但因天雨關係取消。而紅魔鬼球星訪港，吸引大批粉絲到處追蹤，務求跟球星合影「集郵」。有成功埋身傑斯及菲爾鍾斯（Phil Jones）的網友在微博大晒合照。