DaDa脫出星途做o靚辦 Celia K.等攞金像獎

涉足影壇的「百果園咪神」DaDa早前憑電影《低俗喜劇》「爆炸糖」一角奪金像獎最佳女配角殊榮，聲價十倍。以性感起家的她從沒覺得自己做錯：「當時嘅市場趨勢係性感會快啲畀人注意，女人嘅時間唔多，冇太多青春可以浪費。雖然我形象性感，但其實比堅尼都係日常生活會接觸到嘅嘢，我都有自己嘅底線。」

打着性感旗號，的確令人留下印象，但對於將來，DaDa仍然感到一片迷茫，不知如何開拓屬於自己的路：「其實我一直喺度尋覓，咩都會試，好似拍寫真、出書、拍戲等等，就算唱歌、拍旅遊節目、做主持我都無任歡迎！總之想試多啲，搵屬於自己嘅路。」當試過拍戲後，她發現自己對電影的熱愛，參演首部電影《喜愛夜蒲》後，礙於形象關係，接續邀她演出的電影總離不開性感或花瓶角色，令她一度迷茫及擔憂，怕自此被規限於這框框：「接完部戲後，完全冇其他類型嘅電影搵我，嗰陣覺得擔心，差啲要睇心理醫生。多得經理人開解，我先走出陰霾。」

開心有人叫加油

如今正式地戰勝多位影壇前輩攞獎，DaDa坦言心情猶如坐過山車般大上大落，自覺非常幸運，但強調不會驕傲，反而會鞭策自己更加努力，免得讓支持她的親友失望。她笑說：「唔覺『升呢』，而係覺得好似『升職』，依家信心大咗。就算出街，有陣時有人搵我簽名合照，甚至同我講恭喜，又或者叫我加油，真係好窩心！覺得自己付出嘅努力係有人知道，得到認同。」

打了一支大大強心針的DaDa，現已鎖定演員為終身事業，接下來希望挑戰更多不同角色。她說：「電影可以引起社會關注，最想演繹聾啞人士角色，除咗考演技之外，仲想話畀人知社會上有一班人係需要關懷。」 而她短期內的目標，是獲得金像獎最佳女主角提名，她笑說：「就算得咗獎，拍香港電影我都唔會加片酬，自己係拍香港片起家，一定要識得知恩圖報。」

「如果高啲做咗名模！」

同樣因拍電影為人留意的DaDa師妹Celia K.，雖然未如DaDa般幸運獲影展提名或獎項，但Celia憑三級電影《一路向西》的性感演出，已賺取一定知名度。「外界成日覺得o靚模唔使用腦，唔使付出努力，其實我哋都係演員，唔係求其就演得出。」她自認介意被稱為「三級女星」，但強調以性感作招徠，全為符合觀眾喜好：「做人唔可以墨守成規，依家唔性感就冇人睇，性感絕對可以吸引到人哋嘅注意，最緊要過到自己嗰關。」

眼見時下胸o靚模出盡法寶博出位，Celia卻笑言踏足o靚模界純粹上天安排：「以前做硬照模特兒，不過天賦不足，唔夠高。如果我高啲，做咗名模啦！」誤打誤撞成為演員後，Celia決意在影壇繼續發展。對於接二連三邀她演出的均是「港女」角色，她不怕被定型，反而高興能發揮所長：「我係地道嘅香港女仔，講嘢好快、又冇尾音，好啱做呢啲角色。我喺影壇仲新，等我吸收多啲經驗，拍多啲適合嘅戲，遲啲先挑戰深層次嘅角色。」她夢想成為像楊紫瓊般「演得又打得」的演員，故一直學打泰拳，待有日一展身手。

難望與DaDa試鏡

對於DaDa奪金像獎後被外界質疑實力，Celia即力撐對方實至名歸：「同佢識咗七、八年，佢一直好努力，又鍾意做戲。記得有次同佢去鬼片嘅試鏡，要扮畀鬼追，佢真係跑到癲咗，又即場喺度喊。我讚佢做得逼真，佢話『梗係啦，做戲o架嘛！』真係似模似樣。」她笑言看到DaDa得獎，自己亦激動得流下淚來。Celia視DaDa為學習對象，盼有朝一日亦能獲得提名，踏上電影頒獎舞台。

後記

DaDa自摘下最佳女配角殊榮後，工作接踵而來，跟記者做訪問，不時露出疲態，但一面對鏡頭即展露笑容，甚為專業。至於Celia本身活潑好動，說話直率，兩人剛好是一靜一動，雖然DaDa較早入行打上「師姐」之名，但私下二人老友鬼鬼，沒有芥蒂。