巫啟賢的演唱會昨晚開鑼，大晒靚聲。

巫啟賢闊別16年再於港開騷大晒靚聲，卻遭嘉賓曾志偉嘲笑賤格，更被兜巴星「掌」賞。至於草蜢則公然挑機，向他比「舞」鬥擺甫士，巫老師今次遇上勁敵了！

巫啟賢的演唱會昨晚開鑼，大晒靚聲。

曾志偉（左）取笑巫啟賢「賤格」，更出手兜巴星。

歡歡於台上自彈自唱，愛女心切的巫啟賢忍不住親吻囡囡頭頂。

馬來西亞歌手巫啟賢前晚在會展為一連兩場的《那些年我們一起唱情歌》演唱會揭開序幕，首場邀得好友曾志偉、草蜢及其13歲愛女歡歡擔任嘉賓。歡歡果然遺傳到爸爸的音樂天分，在台上彈琴伴奏及自彈自唱，巫啟賢更笑言曾擔心女兒嫁唔出：「佢細個好似我，仲擔心將來要好多嫁妝先嫁得出，好彩愈大愈似媽咪。」

草蜢Chok甫挑機

他又突然嚴父上身，將歡歡身邊的異性趕絕：「你有冇男友，如果有嘅話我殺咗佢！」他表示今次希望囡囡體驗到搵錢艱難：「畀個女上台想佢感受吓爸爸搵錢幾辛苦，等佢以後買少件衫。」在旁的歡歡竟反擊說：「可能我以後賺錢比你多呢！」

被愛女「落面」後，志偉亦一樣毫不留情，在台上笑他不及譚詠麟紅皆因衰賤格：「佢太有性格，仲係賤格嗰隻，睇吓佢做評判鬧人鬧到咁就知，仲要畀無綫Cut晒！」不甘被踩的巫啟賢即反擊：「你夠係啦！成日捽人塊面！」志偉抵死地說：「畀我捽親都會紅咗，你睇王祖藍同金剛就知。」說畢，志偉即向巫啟賢「施襲」，作狀兜巴星。此外，草蜢亦向巫啟賢下戰書：「你評人就評得多，今次我哋嚟挑戰你跳舞。」蔡一傑隨即擺出不同勁舞甫士，向他挑機。