風騷晒巨鑽（圓圖）的諸葛，昨日親口承認大肚喜訊。

「薛王妃」諸葛紫岐懷孕後一直深居簡出，昨日首次於公開活動承認大肚，被《好報》率先披露腹中「岐麟B」趕做蛇B及月底赴加拿大待產的她，更即場獲贈童裝禮物。

風騷晒巨鑽（圓圖）的諸葛，昨日親口承認大肚喜訊。

薛嘉麟日前陪諸葛逛超市。

拿着BB底褲的諸葛，冧爆指老公不時抽空陪她。

估計已懷孕四、五個月的諸葛紫岐（Marie），昨日出席牛仔褲品牌活動時，體形仍見纖瘦，且腳踏兩吋高船踭鞋，手上戴着五卡鑽戒，幸福滿瀉。席間，Marie終於親口承認懷孕的喜訊說：「我依家大肚，會着彈性、舒服嘅鬆身褲。」更獲大會送上童裝作賀禮，其中包括一條童裝內褲，Marie開心得拿起內褲拍照，認真搞笑。

其後Marie坐下受訪，對於BB的性別及懷孕周期，她均故作神秘，笑言過多一兩個月身材便會脹。對於《好報》披露她將到加拿大待產及預計半年花百萬元誕「岐麟B」，她承認：「考慮過，家人好多意見，老爺鍾意澳洲，自己只要安全唔痛就得。用幾多錢冇諗，最重要BB健康。（想開刀定自然分娩？）聽咗好多意見，各有各好。（有冇妊娠反應？）冇嘔，食嘢OK。（計錯日子由馬B變成生蛇B？）其實冇預計今年內懷孕，呢個係天意，係個天畀我嘅BB，好開心。」

爆老公想剪臍帶

Marie指奶奶近月不停供應靚湯給她進補，笑言補得多會燥，又笑言有向老公薛嘉麟發脾氣，幸獲老公回贈更多的愛給她，對她關心備至，又不時陪她行街解悶。問到薛嘉麟會否為BB剪臍帶時，Marie說：「佢梗係想，但我怕佢暈，到時要救嗰個係佢。」對於「妯娌」陳法拉與大伯薛世恒分手，Marie不作回應，只表示有跟薛世恒食飯，她說：「佢心情OK，冇乜嘢。」

另外，有報道指Marie與陳曉東相約食飯，因而傳出東東將加盟薛嘉麟旗下的Neway，Marie解釋與東東是朋友，讚他高大靚仔又唱得，亦坦承東東曾跟薛嘉麟見面傾談。