周秀娜亂石陣仆爆趾公
近年頻頻因工受傷的周秀娜可謂黑過墨斗，前晚她在日本沖繩拍攝旅遊節目時，因為煙花道具失誤，令她仆倒兼腳趾骨折，一心打算與今日來港的緋聞男友里奧費迪南約會的娜姐，Perfect Plan要臨時變陣，但對方窩心承諾若時間許可，定會前往探望。
包紮咗右腳的娜姐坐住輪椅抵港，痛爆嘅佢攬住毛公仔轉移注意力，真陰功！
右腳受傷的娜姐痛到面容扭曲，工作人員正了解其傷勢。
娜姐返港後即往醫院照X光及治療傷勢。
在工作人員攙扶下，娜姐勉強企起身上車，並友善地向記者揮手。
性感女神周秀娜為拍攝無綫旅遊節目《度身訂造旅行團》，日前出發到日本沖繩進行拍攝工作，豈料前晚進行倒數第二日拍攝時，因煙花道具突然失控，她嚇得在滿布亂石的石灘奔跑而仆倒，令腳趾受傷，連之後浸溫泉及滑翔飛行的拍攝工作亦叫停。
適逢英超班霸曼聯大軍今日抵港，娜姐緋聞男友里奧費迪南、前鋒尹佩斯及葡萄牙國腳蘭尼等均會現身。據知，Single and Available的娜姐本來打算與費迪南見面，惟因腳傷在身，分分鐘令約會泡湯，不過費迪南表示非常擔心娜姐傷勢，更指若時間許可，一定前往探望。得到費迪南如此窩心的回覆，難怪娜姐在機場時心情靚爆！
血灑沖繩送院
昨晚約六時許，戴黑超、坐在輪椅上的周秀娜現身香港機場，以熱褲拖鞋、攬住公仔示人，右腳腳趾公包上紗布，右膝亦見明顯傷痕。記者上前慰問娜姐時，她大搞爛Gag，明顯心情輕鬆：「我子宮（趾公）冇事，不過隻腳流咗好多血。尋晚拍攝放煙花嘅場面時，有一、兩支煙花突然失控自爆，現場太黑，所以唔小心仆親，痛到出唔到聲，流到成地血，自己都唔敢望，工作人員好擔心，即時送我去當地醫院止血。（傷勢如何？）未知，喺當地乜都冇照到，依家去法國醫院睇吓。遲啲仲要返內地拍劇，會有動作場面，希望冇事。」問到會否向無綫索取賠償時，她尷尬地說：「唔會，都係意外啫，係我論盡。（心口有冇整親？）上半身仲可以見人。」
無綫保險加碼
至於無綫外事部副總監曾醒明表示，因為他欲聯絡時，拍攝隊伍已上機，要待返港才知道詳細情況，問到無綫有否為藝人買保險時，他表示向來有替台前幕後買保險，而到外地拍攝時會再加碼。
而娜姐經理人Roy透過電話說：「娜姐同無綫都有買保險，希望唔係人為疏忽。（娜姐傷勢如何？）佢照咗X光，證實係趾公骨折。」
