子丹50歲牛一High爆咀詩詩
「宇宙最強」甄子丹50歲牛一，老婆汪詩詩為他包場舉行60年代主題生日派對，多名圈中名人均非常「聽話」以復古造型出席。異常興奮的子丹不僅嘟嘴扮Cute，更與老婆公然打情罵俏，在眾人面前咀足30秒！
子丹被封「宇宙最強」，當然要耍雙節棍娛賓啦，即場加送埋嘟嘴！
甄子丹
子丹咀足詩詩30秒，大晒恩愛。
大美人關之琳性感出席，引人注目。
千嬅跟老公丁子高盛裝到賀，真係畀面。
圓圓見到加讚到場，即讚：「好靚仔呀！」
小齊以葉問Look參與派對，絕對贈興。
甄子丹今日50歲牛一，昨晚他在中環包場，以60年代背景為主題，舉行大型生日派對。多位圈中名人悉心打扮畀面出席，包括汪圓圓與未婚夫蔡加讚、蔡志明、湛琪清、關之琳、李嘉欣與老公許晉亨、楊千嬅與老公丁子高、陳慧珊兩夫婦、陳妍希、名模琦琦及陳祉妤等人，而任賢齊則以一身葉問Look到場，一見記者即笑說：「我今日專登扮葉問，原來唔符合主題，佢都唔係60年代嘅。」
晚上約8時20分，子丹偕老婆汪詩詩從會場出來接受傳媒訪問，兩人的造型襯到絕，身穿綠色恤衫襯大喇叭褲的子丹配上勁粗金鏈，拍照時由「宇宙最強」變「宇宙最萌」，不時嘟嘴扮可愛，又Show Off狂耍雙節棍，表現異常興奮！子丹亦非常識做，一開口便大讚老婆：「原本諗住同屋企人食餐飯，但心入面知道老婆好錫我，幫我搞呢個Party。」此時詩詩即撒嬌說：「哎吔我好辛苦o架，其實子丹之後都知有呢個Party，不過唔知會發生咩事，呢身造型都係我幫佢襯嘅！」
設計影相App賀壽
子丹聞言即擺出一副冧樣說：「老婆真係好好呀！」隨即錫了詩詩面珠一啖，更情不自禁肉緊地再「長啜」老婆面珠30秒，非常冤氣！詩詩說：「我仲準備咗另一份禮物，我覺得好大份o架，準備咗成年！就係設計咗個影相App畀老公，叫『Donnie Yen App』。老公平時拍戲咁辛苦，成日整親受傷，所以幫佢Fans設計咗呢個App，等佢同Fans可以Close啲，多啲互動，今晚都會同嘉賓影相放上去！」更即場示範與老公恩愛合照。問子丹今年生日願望，他說：「希望香港經濟好，全球都經濟好！」
圓圓預祝20周年
甄子丹姨仔汪圓圓中指包着紗布出席，她表示日前跟愛犬玩耍時，誤被樹枝弄傷：「之前冇理到，睇醫生先知要開窿拎番出嚟。（好彩唔係戴婚戒隻手指？）係呀，仲有四個月！」問到未婚夫蔡加讚可有責怪她不小心？她即甜笑說：「佢知我論盡，娶得我梗係要包容我啦！」並表示準備了一支十年紅酒作為姐夫賀禮：「佢哋結婚十周年嘛，好難搵o架！希望佢哋儲到20周年先飲！」此時梳了「蛋撻頭」的蔡加讚到場，圓圓即大叫：「好靚仔呀！」
穿一襲綠色懷舊裙的汪詩詩表妹湛琪清心情靚爆地滿場飛，她說：「所有人都玩得好開心，我好鍾意呢啲主題，好少時間可以咁樣！」問到準備了甚麼物品送給表姐夫，她說：「秘密！佢咩都有，好難買禮物，不過我知佢好鍾意一個牌子，所以送咗嗰款牌子一件好舒服嘅衫畀佢。佢忙吖嘛，咪想佢着得舒服啲！」
