任達華執導的電影大獲好評,果然是實力派!

執導靈異電影的任達華自爆經常疑心生暗鬼,加上其親身經歷,令他有得震冇得瞓!幸而作品獲不俗的回響,可謂飲得杯落!他將自己比喻為「新人」,期待各界多給意見。

任達華執導的電影大獲好評,果然是實力派!

華哥提起早前的靈異經歷時仍心有餘悸!

為令拍攝效果更佳,華哥不惜到各個「勝地」取景。

華哥執導新片《迷離夜》其中一個單元《贓物》,電影上映前獲邀於《紐約亞洲電影節》及《釜山電影節》播映,網民對其作品予以肯定:「Simon Yam(華哥洋名)唔拍戲真係可以改行做導演!」觀眾寄予厚望,華哥開心地說:「我哋呢啲初哥,只希望戲迷多啲意見、多啲鼓勵啫!」受訪期間,他多次提及開工時緊張到睡不着,原來他主動要求到經常發生車禍的天樂里實地取景,並花了多天與小演員困在80呎的棺材房內「入戲」,以便進行相關拍攝,精神上的疲憊可想而知,他說:「總之可以用五個字嚟形容:『疑心生暗鬼』!」

法師上門視察

他早前到內地出席活動及打高爾夫球,並讓同行的髮型師於入住的套房客廳「打地鋪」,卻發生鬼魅事件!他憶起時仍毛骨悚然:「一大班人喺同一個環境、同一個角度影相,淨係得攝影師部相機影出嚟嘅相係有個白色衫嘅『人頭』喺度,睇到非常唔安樂……返咗香港後,有日酒店打電話嚟,話嗰間房已經搞番好。我咪問究竟咩事囉!原來佢哋搵咗個法師上去睇,知道有個『女仔』喺客廳度冇走到,即係佢嗰幾晚陪住我瞓!」他用「硬幣」來作比喻:「呢啲事其實有兩面,睇你點睇囉!人喺唔如意時會愈諗愈恐怖,相反亦然。」