黎耀祥望冧莊代言40年

黎耀祥昨日到將軍澳出席百佳四十周年活動，他已連續四年擔任代言人，問到和黃擬放售百佳，對他可有影響？祥仔說：「冇影響，廣告都係逐年續約，啱啱3、4月先續完約，新約最快都要出年先傾。轉新公司希望有人工加，TVB都賣咗盤啦！大公司只會愈嚟愈好，唔會有影響嘅！」擔任代言人的他年年有人工加，故大賣口乖：「我由細到大都鍾意同阿媽行百佳，買嘢仲可以消磨時間。我仲係最長壽嘅百佳廣告代言人，希望再做多四十年，到時同百佳慶祝八十周年生日！」

祥仔最近完成新劇拍攝後投入搵真銀，昨日完成活動後即飛往福州登台，提到內地航班經常延誤，他笑說日後傾合約或要考慮加入「航班延誤酬勞」。祥仔之後將與家人去旅行充電，他說：「已經有15年冇正式一家人去旅行，好期待今次兩個禮拜嘅日本旅行！」

劇接劇冇時停

視帝唔易做，日本之旅結束後，他將開拍兩套劇集，下月中要到天津客串王晶為無綫拍攝的時裝劇，飾演汪明荃年輕時期的丈夫，其他演員有劉愷威及蕭正楠等；九月則會返無綫與蘇玉華拍另一套新劇。