劉家良出殯翁靜晶靈堂向邵氏追分紅

上月病逝的功夫導演「一代宗師」劉家良昨晨在世界殯儀館出殯，遺孀翁靜晶、六女一子、大批徒弟及後輩齊集，治喪委員會主席陳百祥（阿叻）與太太黃杏秀、徒弟鄭少秋與冼國林，甚至財爺曾俊華亦前來向師傅作最後道別。

「冇五千萬都有五百萬」

瞻仰遺容前，翁靜晶向在場逾200名賓客致悼詞，竟爆出劉師傅多年來沒有收過邵氏電影的花紅！她表示將成立劉家良導演慈善基金，幫助武師及推廣中國武術，並率先捐出一百萬元，又指師傅與邵氏簽下不少合同，包括有國際花紅及香港花紅，但30年來沒有收過分文，她愈說愈激動：「相信邵逸夫好仁慈咁儲起呢筆錢同拎去投資，冇五千萬都有五百萬，希望邵氏支持基金，捐一筆錢！今日講呢番說話好需要勇氣，好在得仔女支持，今日唔講冇機會講，希望邵逸夫聽到呢番說話，你唔會蝕o架！將師傅嘅戲重新包裝一次，可以再賣過錢o架！」全場即拍掌及叫好，翁靜晶表示多謝。此外她又提及劉師傅於07息影，但其實早在拍《南北少林》（1986年）已差點「畫上句號」，幸得麥嘉幫忙。

其後翁靜晶在兩名女兒及冼國林陪同下出席解穢酒，問到追討花紅是否師傅遺願？她表示師傅一直將事件放心中，希望今次完成其心願，問到有否合約證明？她說：「當然有，至於咩形式呢？王羽都有嚟，佢同合同有好好聽嘅故事，但我唔詳細講，師傅有好多呢種合同，有啲冇年期，佢當時法律常識唔好，以為永久性，對佢演藝發展都有顧慮，合同話有花紅分，畀到我哋好靚好憧憬嘅畫面，但原來得唔到。」問到曾否有追分紅行動，她表示師傅豁達肯吃虧，並多次指相信是邵氏「睇漏咗」，又自嘲追分紅失禮：「師傅有大男人胸襟，唔似我小女人咁小器，我都覺得失禮，希望大家包容。（搵阿叻做中間人？）唔需要，就算改名做邵逸夫基金都冇所謂，只要幫到人。」至於會否訴諸法律？她說：「唔講呢啲，一定係睇漏咗，等佢哋睇清楚先。（邵逸夫同六嬸方逸華有聯絡你？）咁多年來都好清靜，人窮思舊債，可能計完係冇嘅，冇所謂，大家賓主一場，都想佢哋參與基金。」期間她提及一件事，但誤將幕後人員阮繼志講為監製戚其義。

黃家禧指公道自在人心

對於師傅與邵氏的合約問題，阿叻表示是第一次聽聞，問到師傅遺言有否提及？他說：「冇聽過，可能咁親密嘅嘢只同佢講，冇人知，我冇意見。（你做中間人？）唔會喇！我幫手出殯嘅事。」

邵氏高層黃家禧昨日接受電話訪問時說：「我講兩樣嘢，一，你哋信唔信呢？二，我冇嘢回應！」再說出「公道自在人心」便匆匆掛線。