羅霖嘲黎淑賢虛偽

羅霖昨日出席在東莞舉行的《觀瀾湖慈善夢幻嘉年華》，她日前與昔日好姊妹黎淑賢（Bonnie）出席活動時，爆大鑊透露對方託她介紹離婚律師，但Bonnie事後否認離婚，並怪責羅霖失言，兩人反面收場！問到是否與Bonnie關係決裂？羅霖說：「我同佢唔係報道講嘅『好姊妹』，只係朋友。（你當佢朋友，佢唔係？）要問番佢，佢嘅嘢唔回應。」爆大鑊當日，兩人即場召開「閉門會議」，再見傳媒時羅霖即轉口風，指對方只是託她找律師改名，問到是否被迫講大話？她稍作思考後說：「都唔係，希望身邊朋友幸福快樂。」

刪博文退出娛圈

她自言不是記仇的人，並表示過往的經歷令她學懂分辨誰是「虛偽的人」。問到與Bonnie現時的關係？她即句句有骨地表示朋友分十種：「有啲會傾唔完偈，有啲做慈善朋友。（Bonnie係邊種？）有Hi Bye朋友，有虛偽朋友，嘻嘻哈哈嗰啲，你都知邊種。（唔再介紹律師畀朋友？）唔會，我份人唔主動，有人搵先會幫。」此外，她透露最近在新戲中與歌手關楚耀有激情戲，獻出螢幕初吻：「第一次同有鬍鬚嘅人錫，好痛，拍咗五次唔同角度！我拍之前失眠，因角色寫實，講有錢嘅離婚女人。」並透露拍攝時要清場，更穿了三條內褲防走光。另外，黎淑賢昨日刪除所有微博博文，並透露將退出娛樂圈，故不會再更新微博。提到羅霖指她為人虛偽，她表示明眼人一看便知事實，不會再回應連日的是非。

熊黛林拒戀圈中人

同場的熊黛林（Lynn）透露下半年會接拍兩部戲，並表示如《葉問3》開拍，她將參與拍攝。有指甄子丹將不接拍該片，問她想唔想原班人馬上陣？她說：「想就想，但要尊重黃生（黃百鳴）。（想邊個做男主角？）唔知，你問我揀男友就知要乜，要錫我，成熟，主動。（有冇人追？）睇定啲先，一時衝動會浪費時間同累咗人。」問到追求者是否圈中人？她只透露不想與圈中人發展。問到是否被過往經歷嚇怕？她說：「要多啲時間睇清楚，要穩定啲。（以前嗰個唔成熟？）唔係話人哋唔好，兩個人相處唔到，唔可以勉強。」