唯唯閉門被Out反內定

未知是否為免藝員再受「傷害」，無綫前晚將「百彈齋主」巫啟賢及郭偉亮抽起，轉由「忠臣」克勤及譚校長做評判，更聲稱為保持神秘將閉門錄影，只讓傳媒拍攝大合照後就要離場，不過始終禁不住消息流出！

據知，當晚依然是「台柱」鄭俊弘奪得全晚最高分數，而曾被指是內定三甲的唯唯最終冇得留低。是次以獻唱評判歌曲為主題，唯唯挑戰私交甚篤的譚校長名曲《愛情陷阱》，載歌載舞演出獲得不少掌聲，原唱的譚校長更是評判中給予最高分數者。唯唯翌日接受電話訪問說：「校長聽完都話我大膽，因為首歌幾難唱，不過佢話我太心急入快咗，之後聽拍子都啱番。」他大讚譚校長厲害，聽得出他降了度半Key，這樣仍可唱出其神髓：「克勤都話後生仔係急啲，佢話我叻過校長，識背晒歌詞，有樣嘢叻過佢哋，識得跳舞。」雖然今次落敗，唯唯卻未有灰心，反而樂觀地說可以來個大平反，事關之前一直指他是內定三甲，如今可證明到公司是公正、公平及公開。

保留評判狠批

至於鄭俊弘也是獻唱譚校長金曲《愛的根源》，同是勁旅之一的李璧琦則挑戰克勤的《大會堂演奏廳》，對於今次換走狠評評判，問到兩人會否更輕鬆？鄭俊弘卻稱反而更緊張：「因為要唱評判嘅歌，當住佢哋面唱大壓力、非常驚。」一唱成名後，他承認工作量有增加，並笑言還可有進步空間。

另外，無綫前晚播出第二集《星》明顯有改進，即使巫啟賢叫無綫「慳啲」煙及狠罵唯唯低分是應得等評價都有保留。對此，外事部副總監曾醒明表示無綫會從善如流，知道評判有建設性的批評觀眾較喜歡收看，同時亦可令節目更豐富：「有建設性嘅意見對藝人發展有積極改善。（係咪第一集被轟先專登留番？）又唔係，我哋想個節目有真實感，有埋評判專業意見會更好睇。」