Miki嘉欣BB怕「書」避對撼
書展明日會展開鑼，一眾「露模」照舊冇得留低，而今年寫真戰中兩大女神鍾嘉欣與楊愛瑾（Miki）雖同樣賣泳衣照，但獲「特赦」可在會展舉行簽名會，未知是否怕輸給對方，竟巧合地分開兩日搞簽名會互避！
今年寫真戰兩大女神楊愛瑾與鍾嘉欣進擊書展，卻分開兩日宣傳，看來不欲正面交鋒！
Dominic
趙勁皓
年度盛事的書展明日於會展揭幕，一班瞄準宅男市場的寫真女早已蓄勢待發，但近年主辦方香港貿易發展局收緊尺度，今年一如既往，全部「胸」模冇得留低，未能獲批入場搞活動。今年寫真戰三大熱門之一、同樣賣泳衣寫真初露「峰」芒的鍾嘉欣及「舊餅碎」楊愛瑾（Miki）卻逃過一劫，可以與其他出書藝人齊齊舉行簽名會鬥人氣，反觀另一焦點「魔鬼胸」蔚雨芯（Rainky）則自動「升呢」揚言唔恨去，從未申請入場。
面對一班喪露模，嘉欣BB、Miki與Rainky今年加入寫真戰團大鬥法，如今嘉欣BB與Miki順利「進擊」書展，未知是否怕輸給對方還是怕殺錯良民，兩人決定互相避戰！打頭陣的是19日入會展、賣清純的嘉欣BB，將會為買書粉絲握手又簽名，親身冧暈宅男。
事隔兩日，處女出書的Miki亦會踩入會展慰勞一班粉絲，打算派150個籌的她自言已準備禮物：「有兩份禮物，一份係美容產品，另一份係神秘禮物，唔講得住。（送抱抱？）唔會啦！怕唔夠時間。」但表示不會打扮性感入場：「我着得型加靚，我係Sell靚唔係Sell性感。」
蔚雨芯另找場地
反觀另一焦點、來勢「胸胸」的Rainky卻未見蹤影，其經理人公司發言人直言是故意避戰：「以往好多模好多新聞，Rainky本寫真賣高貴路線，唔同啲模，所以冇打算入書展，寧願另揀地方搞簽名會。」還透露已獲大型廣告公司贊助，快將舉行大型簽名會。記者昨日致電Rainky求證，她亦說：「我都唔恨去！其實我都唔想同人湊熱鬧，出寫真係想多啲人認識我。」她又猶如自動升呢，指自己的寫真不可與其他「胸模」混為一談：「我唔同，我有好大量嘅支持，而且我本寫真同其他人好唔同，我唔係複製人，又冇整容，唔可以同佢哋比較！」
男子組今年亦加入戰團，三位「裸晒」男模Dominic（何浩文）、「爆肌曉明」顧又銘與周秀娜師弟趙勁皓成功通過審批入場，可以在20日一同舉行簽名會，當中露股的Dominic開心得不停自誇：「我哋啲係有功能性嘅書，好開心到時可以同粉絲分享。（模入唔到唔抵？）冇話抵唔抵，書最重要有內容，唔係鬥少布。」顧又銘則表示不明白其他人為何未能入場，而趙勁皓則「安慰」一班模：「今年入唔到唔緊要，下年再出過，再接再厲，有好多人都出咗幾年啦！」
書展重點觀「星」 表
19/7：Regen@HotCha
時間︰1:30pm至2:30pm
地點︰會展4樓君爵廳
鍾嘉欣
時間︰3:00pm至4:00pm
地點︰會展4樓君爵廳
20/7：陳嘉佳（小寶）
時間︰1:30pm至2:30pm
地點︰會展4樓君爵廳
Dominic、趙勁皓、顧又銘
時間︰3:00pm至4:00pm
地點︰會展4樓君爵廳
黎芷珊
時間︰4:00pm至5:15pm
地點︰會展會議室S424
21/7：楊愛瑾
時間︰12:00pm至1:00pm
地點︰會展4樓君爵廳
傅穎
時間︰1:30pm至2:30pm
地點︰會展4樓君爵廳
何韻詩、黃耀明、趙式芝
時間︰1:30pm至2:30pm
地點︰會展4樓君爵廳
