范振鋒李思欣互相遷就 捍衞婚姻

范振鋒（Ricky）1995年行擔任唱片騎師，2011年與拍拖四個月的李思欣拉埋天窗。雖然兩人年紀相差十載，但絕無影響感情，性格上更可互補長短。范振鋒透露與太太是透過工作共事互相了解，其後主動出擊贏得美人歸：「七年前，我同佢同一個經理人但唔熟，講嘢都冇半句，因為大家當時都有拍拖。2010年12月31日有個倒數活動，當時單身嘅我見到佢有份獻唱，經搞手阿Bob幫手試探吓，得知原來佢都係單身，就叫阿Bob加埋我一齊唱。我記得為咗同佢合唱仲缺席下一個活動！就係咁，我主動開始追求同發展。」

怕行性感惹閒言

兩人婚後相處上難免會出現問題，幸好彼此願意互相遷就，問題才得以迎刃而解，Ricky說：「初時佢會為啲小事而忟，我同佢講要學識睇開啲，有啲控制唔到嘅事就唔使太過執着。佢之後係有改同控制情緒，依家明顯有進步。」他尊重太太，容許她婚後繼續於圈中發展：「我識佢時已經知佢鍾意做戲，無論舞台劇、電影定電視。我希望佢可以做生意，佢依家讀緊珠寶鑑定，會創業做買賣，我會用個人經驗同知識去協助佢，希望佢可以有好成績！」問到不允許太太做甚麼？他笑言「性感」是最難的一關：「真係用心良苦，佢成日話我唔畀佢性感，其實我知男人嘅心態，平日男仔見到女仔着得性感或者走光，背後都會有說話：『個女仔咁搏命做乜？性感、走光就會紅咩！』所以唔想太太喺背後畀人閒言閒語。」

范振鋒指太太雖然年輕尚輕，但思想比同齡女生成熟，令他最為欣賞：「我同佢思想上都成熟，係踏實派。大家做娛樂圈都有上進心，唔會埋堆或者用手段踩人上位，如果其中一方有呢個心都會不屑對方。我哋唔八卦，唔鍾意講人是非。」他續說：「我哋年齡有差距，日常生活中面對好多事，大家睇法會唔同。我自問比較成熟，初頭同佢有意見分歧時同佢講意見，佢話我態度強硬，我知道後都有改善。原來對唔同人可以用唔同方法，對太太就要用軟功，好彩佢真心明白我係為佢好。」

李思欣2011年宣布與范振鋒拍拖，四個月後便拉埋天窗。她笑言入行後曾斷言不會與圈中人拍拖，豈料最後卻下嫁范振鋒，令朋友、家人及自己都始料不及，思欣說：「其實結婚前都擔心過大家同樣係圈中人會產生嘅問題，大家時間上會比較難配合，同埋好少時間見面，加上外界認為娛樂圈誘惑多。不過，我哋婚後相處得好好，我先明白當你搵到一個可靠同可依賴嘅另一半，其實對方係圈中人都有好處。」思欣與范振鋒的興趣都關於工作，亦因此愈行愈近。她透露傳媒多數會相約兩人一起做訪問，公開活動亦會邀請他們一同出席，故見面時間不成問題。兩人同為圈內人，很多說話講一句便會明白，不需再花時間講解，思欣說：「最重要係個人本質問題，而唔係另一半係咪圈中人。」

兩人已婚兩年，相處上沒有大問題，但生活習慣上仍有地方要互相遷就，而「遷就」亦成為婚後的最大樂趣，思欣說：「佢夜晚開電視開到勁大聲，連瞓覺都要有聲，我要等佢瞓着咗先去熄。我都用咗一段時間先適應到，佢依家冇開得咁大聲。」她透露兩人在生活習慣上有分別，如老公社交圈子廣、朋友多，而她則欠活躍：「都要適應佢嘅生活圈子，對我嚟講轉變都幾大。我明白佢朋友多，有要幫朋友嘅時候，亦會有工作上嘅應酬，佢份人有交帶，令我非常放心。其實最重要係大家溝通得清楚，可以避免有誤會。我明白兩個人相處係要用時間磨合，係一個好大嘅學問，范振鋒為人細心，即使點忙都會抽空過二人世界。」

信任大於一切

老公的拍檔曾傳出桃色新聞，李思欣曾問過老公，他總會說：「咦，乜咁嘅？我梗係唔同啦！我與別不同o架！」問到是否對老公投信任票？她坦言曾擔心老公行差踏錯：「初初有擔心o架！仲會反問如果發生喺我身上會點。但呢啲嘢係冇得擔心，亦唔到你擔心。你選擇同佢一齊，就係選擇咗對佢信任。大家結咗婚住埋一齊，其實好多嘢都會知，冇理由咁叻嘅！如果真係發生咗，我覺得婚姻係去珍惜，如果我對佢好而佢唔珍惜，係佢損失。」

問到可有感動時刻？思欣透露老公曾於澳門完成工作，她即到當地會合遊玩。她搭船時已感到不適，落船後更辛苦，但為免影響心情及掃興仍撐下去，她說：「最後都要送入澳門一間醫院，咁大個女第一次吊三包鹽水！佢喺房度只挨喺床邊，成晚冇瞓。返到香港我瘦咗好多，得番八十幾磅，佢心痛到暗地裏為我喊過但冇畀我知，雖然佢平時睇嚟有啲輕佻，但其實好關心我。」