黎淑賢耍手擰頭否認離婚，羅霖卻在另一邊玩踢爆。

前亞姐黎淑賢（Bonnie）昨日到澳門出席活動，並澄清近日的離婚傳聞，可是轉個頭好友羅霖卻「玩踢爆」，承認Bonnie託她介紹離婚律師！其後兩人夾了口供，才表示找律師只是為改名！但據知羅霖多口令Bonnie甚不滿，關係出現裂痕！

黎淑賢耍手擰頭否認離婚，羅霖卻在另一邊玩踢爆。

羅霖

黎淑賢帶三個囝囝出席活動，晒親子樂。

羅霖襯晒母子裝亮相。

黎淑賢與羅霖抱抱合照後，始知被「爆料」！

夾完口供後，黎淑賢與羅霖齊齊澄清，前者講到眼紅紅，後者睇到笑笑口！

昨日黎淑賢帶同三名兒子到澳門出席動畫電影《極速TURBO》首映，其亞姐好友羅霖與兩子襯晒衫亮相，同場藝人包括謝婷婷、陳煒、陳倩揚一家三口及組合農夫等。Bonnie最近與現任美容醫生老公許智政（Angus）傳婚變，Angus多次被拍到與公司女職員密會，疑出現「小三」。對此，Bonnie全程笑住澄清，她表示近月有很多失實報道及惡意中傷，與Angus商量後決定交由律師處理，問到是否有「小三」及是否找羅霖介紹離婚律師等問題，她統統說：「與事實不符！」她表示仍稱Angus做老公，問到是否仍很恩愛？她說：「我哋好開心！（佢唔一齊嚟？）佢要返工，唔係邊個搵錢畀我？（日前你生日點過？）屋企切蛋糕，好開心！（老公送咩？）唔透露喇！」對於老公與女職員過從甚密，她表示不理會老公公司的事，指今次是最後一次出席公開活動，之後專注湊仔。

夾完口供稱搵律師改名

其後羅霖受訪時卻玩「爆料」，曾離婚的她表示與Bonnie互相扶持，如對方代言人般說：「無論咩原因離婚都有一段辛苦過程。（向你訴苦？）互相傾訴吓啦！（你介紹離婚律師畀Bonnie？）係呀！（佢老公有『小三』？）大家有睇報道，呢個係其中一個原因。」此時Bonnie現身與羅霖擁抱，但當她得悉被爆料時，略為激動地說：「唔明點解佢咁講，佢又唔係當事人。（搵佢介紹律師？）冇可能！（原諒老公？）佢都冇做錯，何來原諒？」遂表示要跟羅霖「溝通吓」！約十五分鐘後，Bonnie及羅霖再作澄清，明顯夾口供，聲稱找律師只因Bonnie想改名， Bonnie說：「半年前已經想改名，做咗改名契，但未入紙。（點解版本有分歧？）好耐冇聯絡，可能佢睇新聞誤會咗。」期間講到眼紅紅。

事後Bonnie接受電話訪問時氣難下：「佢介紹律師，咩用途都唔知就自己猜度，應該問過我先，佢有同我解釋話剛剛落機，都係睇新聞。」羅霖則澄清並非踢爆，不擔心影響友情。據知，羅霖離婚時，Bonnie默默支持，今次她卻「爆料」，令Bonnie甚為不滿，姊妹反面！而婷婷表示分手後心情OK，不急於再拍拖，暫以工作為先。