Winkie@HotCha醉愛啤一啤
啤酒大家飲得多，自家製啤酒又有否試過？女子組合HotCha成員黎美言（Winkie）不但愛飲啤酒，更懂得釀製啤酒。對啤酒要求甚高的她更自家研製出薄餅味啤酒，務求欺騙自己的味蕾，做到飲啤酒時猶如有食薄餅的快感！
Winkie自家研製的啤酒，不知味道如何？
釀酒過程
step1：消毒所有釀酒器具，以免細菌令啤酒變酸。
step2：把大麥放進網袋中，然後再加水煲一至兩小時，煲的過程要控制火候和溫度。
step3：把煲過的大麥拎走隔渣。
step4：把啤酒花加入煮過的大麥溶液中，繼續煲一段時間。
step5：把煮好的溶液放入玻璃樽內，並加入酵母，讓其發酵兩星期。
step6：把發酵過的溶液注入啤酒樽，放入適量的糖給酵母作食物，然後封樽，讓其繼續發酵兩星期。
step7：發酵兩星期後，啤酒便大功告成，此時可把啤酒開樽，量度其酒精濃度並試味。
本身對紅酒、白酒甚有研究的Winkie，強調啤酒並非大家想像般簡單，其種類、口味之多足以令大家花多眼亂，咖啡味、榛子味、薄餅味，只要想像得出就有可能調製得到！她說：「紅白酒講究葡萄嘅品種、出產地、年份等，而味道方面大家會在意紅白酒所含嘅果味、質感。其實啤酒嘅味道都可以好大分別，唔止市面上見到只有唔同牌子嘅分別咁簡單！美國就有好多酒廠出產唔同口味嘅啤酒，好似咖啡味、榛子味、薄餅味同朱古力味等。」對啤酒講究的Winkie，為迎合口味，特意調製不同味道的啤酒：「其實釀製啤酒所需要嘅材料好簡單，就係大麥、啤酒花同酵母。而可以將啤酒調校到咁多種口味，全因啤酒花嘅數量多寡、大麥嘅烘焙過程。」
談起釀製的過程，Winkie更恍如啤酒專家上身：「首先要將所有釀啤酒嘅器具消毒，消毒過程好重要，因為只要有細菌或微生物污染咗啤酒嘅話，就會令啤酒變壞變酸。跟住將啲大麥加水煲一小時，要注意將溫度控制在70至80度之間，期間可以加啤酒花，啤酒花會釋放出苦味，平衡番大麥嘅甜味，而加啤酒花嘅時間亦會影響啤酒味道，如果早啲落啤酒花，味道就會苦啲，而遲啲落就會甘香啲。最後將煲好嘅液體隔渣，再落酵母，等佢發酵兩星期後就可以入樽。」Winkie笑言釀製啤酒嘅先決條件是「耐性」，皆因啤酒入樽後仍要加糖，讓啤酒繼續在樽內發酵兩星期，最後自家製啤酒便算大功告成！
慘遭借醉揩油
讀書時期便已愛上飲啤酒的Winkie，更試過遇到異性「借醉行兇」：「讀大學時我好鍾意同朋友落Club飲酒跳舞，我哋落Club唔係為咗識男仔，只係享受可以好Relax咁跳舞。不過都試過畀人借醉揩油，對方好貼身咁喺我後面跳舞，當我擰轉面問佢做咩時，佢個樣就好驚，然後9秒9唔見咗！」她強調雖好杯中物，卻從來不會飲醉酒：「我屋企嘅雪櫃永遠存放至少幾支啤酒，同朋友傾偈時，只要兩杯落肚，個人輕鬆咗就可以傾得好放。不過我唔會飲太多，因為女仔飲醉咗會好危險。最多喺自己屋企或女仔朋友屋企飲酒時，先會飲多兩杯！」
