膝痛減輕後，Eason精靈地試穿從未曝光的個唱戰衣。

連日來在紅館個唱上載歌載舞的陳奕迅，原來演出期間飽受胃痛及膝頭舊患困擾，要急急到醫院求診。為消除痛楚，醫生在他腫脹的膝頭內抽出20ml積水，非常誇張！

膝痛減輕後，Eason精靈地試穿從未曝光的個唱戰衣。

Johanna利用Eason的舊衫打造「顯瘦」戰衣，掩飾他胖至188磅的身軀！（資料圖片）

Eason超模上身扭腰擺甫士，令Johanna啼笑皆非！

Eason笑指「絲襪花」是老婆的底衫褲，並抵死地嗅一嗅。

向來頑皮的Eason，試身時嘴藐藐，非常搞笑！

陳奕迅（Eason）25場《EASON'S LIFE》紅館演唱會正火熱進行中，但原來在台上跳跳紮的他，胃部及膝頭接連出問題，要入院治療！Eason自爆一切都是貪吃之過：「有晚喺屋企食咗20粒台灣蒟蒻丸，唔記得要等兩個鐘消化先瞓，結果第二朝發覺個胃頂住好辛苦。」他急急到醫院求診，要服藥消胃氣。

而Eason的左腳韌帶曾經撕裂，至今還未完全康復，經過連場勁歌熱舞，他發覺膝頭有異樣：「隻腳有啲腫，醫生喺我膝頭抽咗20ml水出嚟，抽完即刻鬆晒！」之前一直受膝傷困擾的他，仍無損演出水準，治療後更是拍心口會繼續落力演出！

顯瘦戰衣掩肥肉

此外，Eason日前自爆體重達188磅，但視覺上卻與之前沒甚分別，全因設計師Johanna Ho巧手為他打造多套「瘦身戰衣」！Johanna笑言視Eason為「柱男」：「當佢係一碌好大嘅柱，點樣令一碌大柱360度睇成一碌幼柱呢！我利用線條同打影營造視覺假象，佢着上身就變咗瘦柱！」雖然演唱會已開鑼，但她仍為Eason趕製新衫，日前她便把Eason的舊冷衫及西裝大改造，看見膊頭上一朵朵「絲襪花」，準備試身的Eason抵死地說：「呢啲係咪我老婆啲底衫褲呀！」更作狀嗅一嗅，Johanna即笑說：「唔係呀！絲襪嚟o架！」