安仔阿廉夾攻豹哥「放大鳥」
郭晉安、單立文（豹哥）、曹永廉及李思捷於劇集以幽默方式演活香港中年男人心態，現實中四個大男人儼如大細路般冇時停，大講有味笑話包括各種誘惑及一夜情話題，更大爆為劇集公開自拍裸照。
豹哥慘成「眾矢之的」，惟他樂在其中，任打唔嬲！
大唔透的思捷（後排左起）、阿廉、安仔及豹哥（前）玩得又Talk得，齊齊笑看「中年危機」。
安仔與豹哥於劇中擦出火花兼拍出友情。
豹哥
安仔、豹哥、阿廉及思捷在劇集中演律師，但四位專業人士私下跟普通的「麻甩佬」冇分別，都要經歷男人最怕的「中年危機」。四位不同性格的熟男現實中各有經歷，對於中年危機，「好好先生」安仔及阿廉都試過並勇於面對，阿廉說：「我過晒所有誘惑先結婚。（試過？）好多。」
中年有惑
豹哥則笑言未到中年，阿廉即笑他：「佢一早去到老年，老年咁遠！」豹哥其後認真說：「其實使乜Set咁多界限畀自己，做到就盡力去做。（試過偷食唔抹嘴？）一夜情嗰啲係男人都試過啦！」而唯一未婚的思捷說：「個人角度係唔好將愛情當係計時，唔好因為時間影響自己意願，Feel到啱先去做。（太多誘惑所以未想定性？）冇辦法，我咁靚仔！」
談到拍攝的難忘事，他們均異口同聲表示劇內影了張裸照，思捷說：「因為劇入面我哋好似女人咁，想趁後生仲得就留倩影。」敢作敢為的豹哥亦尷尬說：「因為真係全裸除晒衫褲，大家都好尷尬，同埋亦發現到大家真正嘅性取向。」安仔亦透露拍攝時要清場：「成個場得番我哋4個，同埋部攝影機、遙控，因為唔可以有一張相流出去。（尺度OK？）一秒得，之前吳卓羲拍《大唐雙龍傳》沖涼，定格都見到Pat Pat。」阿廉又取笑豹哥說：「但就算見豹哥一秒都唔會睇到啲咩，你要放大放大再放大。」安仔聞言即加入戰團：「放大後都打晒格仔。」
「陪瞓」換約
去年才回歸TVB的豹哥說：「佢哋話搵我拍《衝上雲霄II》做飛機師，但簽咗之後原來係做整飛機嗰個，但有呢套劇畀我補飛都OK，畀我有番拍劇嘅感覺。」安仔笑說：「呢套劇係為豹哥攞『最佳新人獎』或『飛躍進步獎』而設。」豹哥即說：「你夠喇！」問到是否簽長約時，豹哥再發揮「老作」精神：「咩叫長約？好老實同你講我同高層瞓咗覺，唔講同幾多個高層發生關係，有啲瞓咗後先發現瞓錯咗，有啲唔係呢間公司。」
