Crystal自爆曾因情緒低落而險患厭食症，幸而現已走出陰霾。

跳舞組合HotCha成員張紋嘉（Crystal）一向予人性格開朗的感覺，但她卻自爆曾因情緒低落，險患抑鬱症及厭食症！她在好友的鼓勵下逐漸走出陰霾，將於書展化身才女，出書宣揚正能量！

Crystal自爆曾因情緒低落而險患厭食症，幸而現已走出陰霾。

走出陰霾的Crystal將推出新書，向讀者發放正能量。

Winkie（右起）、Regen及Crystal情同姊妹，缺一不可。

女子跳舞組合HotCha前年突然由三人行變成二人組合，成員張紋嘉透露隊友張惠雅（Regen）離港升學的決定令她跌入情緒深淵：「Regen要離開我哋去外國讀書嗰刻開始，我就變得冇安全感，發現我哋過往努力嘅成果其實可以喺一夜之間失去，怕自己會突然冇嘢做，所以唔畀自己停落嚟，不停搵嘢做，嘗試做舞台監製、寫作出書等。就算放假喺屋企都唔敢玩遊戲機，唔敢有娛樂，怕虛耗光陰！」

出書宣揚正能量

失去自信的Crystal自爆險患厭食症：「之前工作壓力大到令我失去食欲，試過一日一夜冇食過嘢都完全唔覺餓。好彩身邊朋友鼓勵我，捉我去食嘢，加上有機會參演舞台劇，同好多樂觀積極嘅人合作，我先慢慢走出低谷。」走出陰霾的她將出書宣揚正能量：「今個書展我會推出第一本長篇小說，書中擁有超能力嘅主角面對唔少挫折，內容慘情，我想提醒大家要活在當下，珍惜依家所擁有嘅嘢！」