嘉玲讚查理斯王者風範

英國王儲查理斯（Prince Charles）與太太卡米拉（Camilla）於當地時間7月9日，假倫敦大宅舉行皇室派對，招待慈善組織Elephant Family。國際女星劉嘉玲亦是座上客，同場還有名人鄧永鏘及其兒子鄧裕鏗、殿堂級樂隊Rolling Stones主音前妻Jerry Hall、英國模特兒Cara Delevingne及姊姊Poppy等，眾人均戴上動物面具，場面有趣又熱鬧。

嘉玲身穿由巴黎空運而至的Elie Saab閃片拖尾晚裝到場，造型高貴大方。她透露今次是應王儲邀請出席活動：「可以參加呢個派對，我覺得非常榮幸！我本來喺歐洲拍緊戲，為咗呢個派對專程飛過嚟！」她在派對中與王儲有近距離接觸，事後大讚查理斯及卡米拉親民：「佢哋真係好Nice，唔係想像中咁嚴肅，同每位賓客都有傾偈打招呼。最記得查理斯同我握手時，我感覺到佢隻手非常有力量！佢有紳士風度、好有貴氣，有王者風範！（傾咗咩？）Say Hello，佢知我係邊個。（佢見到你咁靚女，有冇驚為天人？）哈哈！唔會，唔知。今次係我第一次見佢，真係一件好榮幸嘅事。（下年想唔想再參加？）都想，當係做善事。」

即場上陣展舞姿

嘉玲透露獲邀前，大會早已調查了全部賓客的個人資料，入場前更需在門口核實邀請卡的身份證，非常嚴謹，但現場氣氛輕鬆，每人更獲發一個動物面具。嘉玲與Jerry Hall及兩名女孩對着大會鏡頭拍了一段片，她笑說：「我要喺段片入面跳舞，因為係即教即學，我都唔知啱唔啱節拍。」另外，大會邀請了24名歐洲藝術家創作動物造型的藝術品，分別置於24個房間內，日後將用作慈善拍賣。