祖兒Fiona升胸撼鄭融
樂壇天后容祖兒、歌手薛凱琪（Fiona）和鄭融在前晚無綫的《2013勁歌金曲優秀選第一回》中，不約而同地谷胸上陣互搶「峰」頭，谷出「M字胸」的祖兒火併Fiona的「心形胸」和鄭融的3吋事業線，「墊」出一場驚天動地的「胸戰」！
一身緊身束胸馬甲的祖兒在台上勁歌熱舞，驚現「M字胸」。
穿上超Deep V晚裝的鄭融，勁晒3吋事業線。
Fiona穿上開胸晚裝，令平板身材變得有睇頭！
Fiona（左）在台上與鄭融互頒獎座時，不經意露出「心形胸」。
眾歌手前晚出席無綫《勁歌優秀選》，謝安琪在台上手舞足蹈，引起祖兒及阿Sa注目。
前晚無綫《2013勁歌金曲優秀選第一回》，英皇多位歌手包括蔡卓妍、鍾欣桐、林欣彤及洪卓立等均有斬獲，合共奪得九項獎項，而容祖兒更憑《充電器》、華語歌《加大力度》及跟羅力威合唱的《雙子情歌》奪得兩個半獎成為大贏家！是晚優秀選最矚目自然是女歌手的「爆胸戰」！向來身材一般的祖兒、「iPad」胸薛凱琪竟然不約而同地齊齊極力奮「墊」，積極「上彈」，大晒令人驚訝的激罕事業線！
「金曲獎」冇份唔失望
先以沉色連身裙亮相的祖兒，原來留有「暗湧」，當她演繹歌曲《加大力度》時，換了一身緊身束胸馬甲的她驚現「M字胸」，大騷激罕事業線勁歌熱舞，「波」濤「胸」湧之餘也戥她「牙煙」！而Fiona則以開胸晚裝，成功把「iPad」胸的身材神奇「墊」成甚具睇頭的「心形胸」！就連鄭融亦對Fiona的突然「升胸」嘖嘖稱奇，兩人在接受訪問時則不時作狀偷望對方，互相比較身材，場面惹笑。其實鄭融可謂全晚最性感的歌手，不但肚腩不見了，更穿上超Deep V晚裝，勁晒3吋事業線，狀態勁Fit！
而祖兒接受訪問時表示今次對賽果感到高興及圓滿，而對於在台灣「金曲獎」中未能取得女歌手獎提名，她大方地說：「唔會失望，要配合天時地利人和，唔通人有我冇就唔制咩！」
羨慕G.E.M.世紀拖手
至於鄧紫棋（G.E.M.）跟台灣歌手男友林宥嘉首次恩愛地十指緊扣行紅地氈，祖兒高呼兼預告「世紀拖手」說：「嘩！咁Sweet！（幾時到你？）諗吓啦！等到佢（劉浩龍）有份角逐先啦！有機會都唔錯嘅。」而有傳無綫會把年底的「最受歡迎女歌星」獎頒給關淑怡，祖兒坦言很欣賞對方：「我第一首參賽歌都係佢嘅歌，好開心可以平起平坐，希望可以一較高下。」
至於鄭融表示被造型師讚「有料」並希望她真空上陣，她指身材是「天父賜畀我」，又謂接受不到真空：「呢個係外國人尺度，我流住中國人嘅血，加個Tube都好靚吖！（幾時先肯真空？）似劉嘉玲散發女人味就靚，不過我依家個年紀未係。」另憑歌曲《Nice》獲獎的林峯則沒有出席。
