Ana R.轟o靚模寫真三宗罪

今年寫真戰將於本月17日開火，一班前輩級胸模紛紛上岸避戰，造就一班新進模乘虛而入晒「胸」器，出盡奇招挑戰性感尺度爭上位，又玩半裸又玩雪糕，可惜新女上場欠睇頭，至於今年寫真戰的另一賣點，首次有三位「肌」男胸降挑機。

搽心形Cream騎呢

不過在模界打滾多年的名模Ana R.則狠批一班模的寫真相「冇新意係咁抄」、「似機械人聽Order去剝衫」、「似軟性鹹書」三宗罪，更選Dominic、新進模組合FFx及黃榕入最差三甲。她踩FFx抄橋似「Copy Cat」︰「之前都有人喺身上搽Cream，本來非常欣賞第一個影呢個構思嘅人，但之後影嘅人就好似Copy Cat，冇新意。」其後她又插眾模晒胸器來來去去都玩半裸全裸，缺乏自我，似受命令剝衫︰「好多時為配合公司要求，要性感或半裸，但影出來效果失去自我，感覺似接Order去做，唔識散發自己魅力。」她又踩黃榕胸部搽心形Cream寫真照相當騎呢，美感欠奉。

此外，Ana睇到模梁晶晶擺出擘髀甫士後，即怒插是「軟性鹹書」，並直言冇眼睇︰「點解要影到啲相好似咁Soft Porn（軟性鹹書）？」她又慨嘆現在的寫真已變質，坦言有八成的寫真似鹹書︰「仲差過之前幾年啲寫真集，如果下年都係咁，建議佢哋咪再出寫真！」

至於三位肌男的處男作，她同樣不受落，更指Dominic在寫真中拎住生果放在面上的甫士「乸型」︰「完全唔明白男仔點解影呢啲相，呢啲應該係女人影。」雖然她狠批三宗罪，但大讚蔚雨芯的寫真靚。

遭暗寸老餅Out爆

對於Ana插爆寫真相唔掂，Dominic昨日在電話中反擊，暗寸對方年紀大Out爆︰「我呢本係甜品食譜寫真書，同Fans分享心得，我大部分Fans都係90後，好少80後，我理解佢睇唔明嘅原因。」談到甫士被指「乸型」，Dominic則顯得有點不忿。而黃榕則於在電話說︰「我冇唔開心，搽Cream我覺得好有創意，幾可愛，多人評係好事。」

黃榕

書名：《GOSSIP GLORIA》

賣點：C奶黃榕向來以敢露見稱，尺度大膽，今年的賣肉寫真於北京拍攝。

FF x

書名：《真夏戀人》

賣點：由師姐鄒盈莉（Cecilia）率領六位新加盟的小師妹齊齊向寫真界前輩致敬，明Sell青春無敵。

何浩文（Dominic）

書名：《Dominic's Kandy Krush》（《戀上幸福之味》）

賣點：糖妹男友何浩文扮Cute做「陽光肌男」，還在書中教人做Gym。

梁晶晶（Bonnie）

書名：《Happy Bonnie》

賣點：首次參加寫真戰的梁晶晶，其寫真特意赴日本搞造型及取景，以新鮮感取勝。