樂瞳面皮薄拒絕潛規則

無綫小花樂瞳早前在劇集《情越海岸線》中飾演黃浩然的反叛細妹，因發明星夢而到處闖禍，更險被騙財騙色，她坦言真實的她性格被動，絕不會博上位。對於有女星靠「潛規則」拉關係，樂瞳即耍手擰頭：「我面皮好薄，唔會周圍識人，最多會同相熟監製講吓不如用我啦！我知有人因為識Social掂咗，但我改唔到自己性格，被動係少咗機會，不過唔係你嘅夾硬畀你做，都未必係好事。」樂瞳在《情》劇中有唱歌場面，正好配合她今年再出碟，她希望觀眾記得她是一名歌手。