本報昨日收到讀者爆料，指入圍今屆港姐第二輪面試的Jasmine Yick恨做明星，更經常姣黐前港男黃建東（Derek）並借對方過橋。黃建東接受電話訪問時，口窒窒表示認識Jasmine，但否認拍拖：「係好朋友囉，我選港男時，佢都有嚟做我打氣團為我打氣。（佢成日發明星夢？）佢有做開Model，有條件入娛樂圈，我都撐佢選港姐。（佢姣？）唔特別覺喎，係女人味重啲。（成日請你食波餅？）佢係大情大性嘅人。」

談到有人公開他倆的合照，他即緊張地問是甚麼照片，得悉只是一班人合照時，即鬆一口氣說：「咁好正常，我哋都有共同朋友。」他又表示不排除有發展空間，事實上二人亦經常在Facebook打情罵俏，更不時上載親密合照，Derek亦曾發表「愛的宣言」：「這幾年，我人生中有很多的關口都有你陪着我度過，如今，輪到你了，我也希望戰勝你的關口，得到你想要的。放心，有我在...with Jasmine Yick」。