7中女保鮮回歸

曾志偉處男監製的無綫劇《Aerobic Girls舞室保衛戰》，籌備以來盛傳邀得多位經典女星參演，人選如車輪轉，至昨日於記者會主角人選終揭盅，包括李麗珍、李若彤、張慧儀、葉蘊儀、陳慧珊、袁潔瑩及江欣燕，七中女合體作戰撐志偉，兼為無綫搶話題。七位熟女年紀合共299歲，其中久違了的李若彤是七女中最年輕，現年39歲的她「保鮮力」亦最強，除喼住均勻身形外，五官更似30出頭，與1995年演出《神鵰俠侶》的小龍女時「冇咩分別」，但兩頰卻離奇繃緊。同樣喼得有水準的還有年屆42歲的張慧儀。反觀四字出頭的李麗珍、袁潔瑩、陳慧珊及葉蘊儀雖見精神飽滿，但中女味盡出，皮膚鬆弛，衣着品味師奶味重甚嚇人，葉蘊儀更見脹爆。

李若彤單卵論爆甩拖

李若彤自爆為妹妹湊女湊足兩年七個月，問她可會恨自己生，她即發表「單卵論」，澄清與曾傳婚訊的商人郭應泉的忘年戀已結束，她說：「我都想生，好鍾意小朋友，當姨甥女係半個女。（同老公生小朋友？）單卵點生？我哋分開咗四年半，我冇結婚，依家Available。（有追求者？）冇留意，等緣分到。」自1996年拍畢《天龍八部》後再沒與無綫合作的她曾為今次演出擔心，但透露監製特赦她下月中開工時，保證可瞓足八小時。

李麗珍請假陪反叛女

李麗珍則笑言要全力搵「師奶錢」，又大爆踏入反叛期的女兒尚未接受到她男友潘源良：「個女16歲，等佢大個啲，我自由度都大啲。今年暑假個女會去加拿大讀書，我會請一個月假陪佢開學。自己係單親媽咪，唔係搵奶粉錢，係要搵師奶錢。（同男友結婚？）佢仲忙過我，不過我哋未有計劃結婚。（囡囡叫男友做爹哋？）佢唔會，依家個女係反叛期，唔會逼佢接受，佢大個就會明白。我細個都好反叛同成日碰釘，會教個女要負責任。」問到事隔近三十載再與袁潔瑩合作，她指雙方有聯絡，又大讚對方狀態好。至於有少許發福，但風采依然的張慧儀，昨日所見更有少許吳家麗的韻味，她表示沒有為10歲大的養子找「爸爸」，感情事隨緣，又謂現時做食品生意，但為拍劇只好中港兩邊走。

李若彤 39歲

代表作：電視劇《神鵰俠侶》、《天龍八部》；電影《飛虎雄心》、《十萬火急》

張慧儀 42歲

代表作：電視劇《真情》、電影《超級無敵追女仔2之狗仔雄心》

李麗珍 47歲

代表作：電影《開心鬼》、《蜜桃成熟時》、《不扣鈕的女孩》

葉蘊儀 40歲

代表作：電影《孔雀王子》、《阿修羅》