諸葛報喜做媽咪

諸葛紫岐自下嫁Neway二少薛嘉麟後，對造人一事一直抱順其自然態度。昨午Marie在微博上載一張心愛的麵包超人公仔照片，還寫道：「日子一天一天過，責任也一天多過一天，雖然有些辛苦，但是心中還是有無限的期待和喜悅！」暗示懷有薛家骨肉！其實Marie去年曾成功懷孕，可惜與老公去完夏威夷度假後不幸小產，事後她出席公開活動亦含淚默認事件，曾揚言想於明年即馬年生B的Marie，終皇天不負有心人，一償所願，造人成功懷有「馬B」。而向來愛錫Marie的薛嘉麟，繼婚後贈愛妻九肚山豪宅外，據知近日更計劃入紙做馬主，斥資買名種馬送給太太，極具意義。

口味突變易　

據知Marie現已懷孕兩個多月，本報記者就此事致電她，她並未有否認懷孕，還心情大靚地說：「收到祝福好開心！」問到現時懷孕多少個月？她不置可否說：「講得會講畀大家聽。」似乎跟足傳統，怕未夠三個月公開，BB會小器。至於老公的心情？她坦言：「好開心呀！（有冇唔畀你做嘢？）佢不嬲好錫我，叫我唔好做嘢。（唔畀做粗重工夫？）不嬲唔畀我做。（你口味有冇變？）都有，最大分別係我好容易攰，瞓極唔夠，唔想郁。（重咗幾多磅？）冇磅過。（老公有冇獎勵你？）唔講呢啲。」問到家人是否很緊張？Marie說：「個個都好緊張，奶奶畀好多專業意見我，老公又學好多有關嘅嘢，佢有上網搵有關資料。（你有冇嘔？）冇嘔，我未試過嘔。（但你之前又話出唱片？）要延遲出，做咗大事先，之後先搞唱片。呢啲先係最緊要嘅事，因為唔只一個嘅事，我日常生活都會加倍小心。」

月初暗示懷孕

其實從Marie的微博中，早於本月一日國際兒童節當天，她曾上載一張身在北京飲酸奶的照片，還寫着「六一」，之後又借外來貓入屋，再度暗示家中多了一位新成員，種種迹象顯示，相信她隨時有好消息宣布。而Marie妯娌陳法拉則在截稿前仍未能聯絡上。