賈曉晨驚現6摺肥膏
賈曉晨初出道時憑C Cup「愛美晨」導彈射穿不少宅男心，想不到她有拖拍即自我放縱，變成凸腩女神！前晚她未收身竟膽粗粗以比堅尼上陣行騷，腰肢6摺肥膏驚世現身，贅肉一步一震騰騰，買舊豬腩唔使去拜神！
「女神」JJ叉腰一扭，凸腩與摺痕應聲而出，失策！
背面見真章
正面呃得吓
JJ的豪邁步姿，令水桶腰與粗髀無所遁形。
與趙碩之（左二）及梁政珏（左三）相比，JJ由頭輸到落腳，難怪冇厘表情！
設計圖片及對白
初出道時憑「味之天使」中的「梳打」成為宅男女神的賈曉晨（JJ），入行以來憑索爆33C上圍及高潮眼為人津津樂道！前晚她與「岩石胸」趙碩之及梁政珏等行泳衣騷，未知是否自去年撻着「力王」樊少皇後心廣體胖，她的身形像「吸水海綿」般愈發愈脹，慘變「脹爆女神」！
擁有C Cup上圍的JJ穿三點式騷「事業線」，但因腰圓背厚而令上圍未見凸出，她更出蠱惑以絲巾遮掩腰臀肥肉！雖然女神樣貌保得住，但昔日的23吋小蠻腰竟變水桶，不但肚凸凸，轉身時更出賣了6摺肥膏，肥肉隨其步伐震動，大殺風景！被身材Fit到漏的趙碩之及梁政珏「胸」湧夾擊，JJ明顯跌Watt，女神除名！
戒口減肥呻苦
事後JJ受訪時表示接下泳衣騷前未有跟男友樊少皇商量，寧願先斬後奏：「接咗先同佢講，唔想嘥咁多口水同佢解釋，佢知道咗好驚訝，係咁問我着咁少布得唔得！所以，成個騷9成時間我都係咁照鏡，睇吓有冇走光！（影相畀男友？）唔會啦！做嘢還做嘢。」談及肚皮及背脊的摺痕，她透露因壞習慣所致：「我好鍾意烏低身坐喺度，搞到個肚有摺痕！」更自爆已刻意減肥：「我減咗1個月，戒打邊爐同飯，日子過得好苦，都唔知點解會肥咗咁多！（上圍縮水？）夠o架喇！女仔有肉地至好睇！」並承認今次酬勞滿意：「我原本喺內地拍劇，因為好多錢，所以特登飛返嚟。（幾多？）有6位數字！」
心驚驚冇下次
談及「大解放」騷身材，JJ揚言是「最後一次」:「今次係想賺錢同儲錢，行嗰陣好驚斷比堅尼帶同甩底褲，真係好驚，冇下次喇！（再高價錢都唔接？）除非嗰陣等錢使！」已回復自由身的她趁機賣口乖：「呢個騷係舊公司幫我接，如果第時舊公司有Job啱我，都可以幫我接，最多兩邊（指與未來新公司）抽佣，大家係好朋友！」
